रामेछाप– रामेछाप जिल्लाको सदरमुकाम मन्थलीमा रहेको लिट्टिल स्टार अङ्ग्रेजी विद्यालयले खेलाडी विद्यार्थीहरूलाई पुरस्कृत गरेको छ । यस अघि विद्यालयले आयोजना गरेको विभिन्न खेलकुद प्रतियोगितामा भाग लिएर विजयी भएका खेलाडीहरूलाई पुरस्कृत गरेको हो ।
फागुन ३० गते बुधवार विद्यालय प्राङ्गणमा एक कार्यक्रमको आयोजना गरी पुरस्कार दिइएको थियो । विद्यालयकै अन्तर सदन स्तरीय खेलकुद प्रतियोगितामा विजयी भएका खेलाडीहरू लाई विद्यालयका प्रधानाध्यापक रमेश फुयाल, सहायक प्रधानाध्यापक हस्त बहादुर लामा, खेल शिक्षक समिर घिमिरे र जीवन पहरीले संयुक्त रूपमा मेडल प्रमाणपत्र र शैक्षिक सामाग्री सहित पुरस्कृत गरेका हुन् । पुरस्कृत हुनेमा फुटबल खेल तर्फ प्रथम भएको एसिया सदन र द्वितीय भएको प्यासिफिक सदन रहेका छन् ।
त्यसै गरी लङ जम्प, हाई जम्प, सट पुट र दौड प्रतियोगितामा विजयी भएका खेलाडीलाई समेत पुरस्कार दिइएको थियो । खेलाडी विद्यार्थीहरूको पुरस्कार वितरण कार्यक्रममा बोल्दै विद्यालयका प्रधानाध्यापक रमेश फुयालले विद्यालयले आगामी दिनमा पनि विविध खेलकुद कार्यक्रम संचालन गर्ने बताए । उनले विद्यार्थीहरूका लागि खेलकुद महत्त्वपूर्ण भएको उल्लेख गर्दै राष्ट्रको लागि विद्यालय तहबाट नै राम्रो खेलाडी तयार हुँदै जाने बताए ।
