रामेछाप- रामेछापको उमाकुण्ड गाउँपालिकाले जिल्ला प्रशासन कार्यालय रामेछाप सहित गाउँपालिकाबाट प्रवाह हुने सरकारी सेवा गाउँमै पुर्याउने भएको छ । नागरिकहरुले गाउँपालिका तथा जिल्ला प्रशासन कार्यालयबाट प्राप्त गर्ने सेवा लिन पालिकाको केन्द्र र सदमुकाम धाउनु पर्ने बाध्यतालाई सहज पार्ने उदेश्यले एकीकृत घुम्ती शिविर मार्फत गाउँमै सेवा पुर्याउने भएको हो । गाउँपालिकाले पालिकाका सबै वडा पुगेर नागरिकता, राष्ट्रिय परिचयपत्र, व्यवसाय दर्ता तथा नवीकरण, अपाङ्गता परिचयपत्र र योजना सम्झौता लगायतका सेवा प्रवाह गर्न लागेको हो । वडा तहबाटै दिन लागिएका सेवा अन्तरगत नागरिकता र राष्ट्रिय परिचय पत्र वितरण तथा संकलनको काम जिल्ला प्रशासन कार्यालय रामेछापले गर्ने छ भने व्यवसाय दर्ता तथा नवीकरण, अपाङ्गता परिचयपत्र र योजना सम्झौता लगायतका सेवा गाउँपालिकाले गर्ने छ ।
शिविर अवधिभर नयाँ नेपाली नागरिकताको प्रमाणपत्र, नागरिकताको प्रतिलिपि, राष्ट्रिय परिचयपत्र वितरण तथा नयाँको लागि विवरण संकलनका कामहरू हुनेछन् । यसैगरी नयाँ व्यवसाय दर्ता, व्यवसाय इजाजत पत्र र व्यवसाय नवीकरणसम्बन्धी सम्पूर्ण कार्य पनि वडा तहमै सम्पन्न गरिनेछ । लक्षित वर्गका लागि प्रक्रिया पुर्याई अपाङ्गता परिचयपत्र वितरण गरिनुका साथै रोजगार आयोजना कार्यक्रम अन्तर्गतका योजनाहरू सहित विभिन्न विकास आयोजनाहरूको सम्झौता कार्य समेत वडाबाटै गरिने गाउँपालिकाले जनाएको छ ।
शिविर असोज १५ गतेदेखि २१ गतेसम्म प्रत्येक दिन बिहान १० बजेदेखि सञ्चालन हुने तय भएको छ । कार्यतालिका अनुसार असोज १५ गते वडा नं. १ गुम्देल, १६ गते वडा नं. २ बाम्तीभण्डार, १७ गते वडा नं. ३ कुबुकास्थली, १८ गते वडा नं. ४ प्रीति, १९ गते वडा नं. ५ प्रीति, २० गते वडा नं. ६ गुप्तेश्वर र २१ गते वडा नं. ७ भुजीमा शिविर आयोजना गरिनेछ ।
गाउँबाटै प्रवाह गरिने सेवा लिनको लागि गाउँपालिकाले यस अघिनै सार्वजनिक सूचना जारी गरीसकेको छ ।
