रामेछाप– रामेछाप जिल्लाको मन्थली नगरपालिका वडा नम्बर १२ गेलुमा एक दिने निःशुल्क पशुपन्छी शिविर सम्पन्न भएको छ । मन्थली नगरपालिका तथा हेफर नेपाल परियोजनाको आर्थिक तथा प्राविधिक सहयोग र पहाडी समाज कल्याण केन्द्र दोरम्बाको सहरीकरणमा शनिवार संञ्चालित कृषि तथा पशु विकासमा आधारित साना किसान तथा युवा उद्यमशीलता परियोजना अन्तरगत मन्थली नगरपालिका पशु स्वास्थ्य शाखाको समन्वयमा शिविर संचालन भएको हो ।
वडा कार्यालय सिक्रालमा राखिएको पशुपन्छी शिविरमा २ सय ४ वटा गाई–गोरु र भैँसी, १ हजार १ सय २५ वटा बाख्रा, २ सय २० ओटा कुखुरा र २९ वटा कुकुरलाई उपचार सेवा दिएको थियो । त्यस शिविरमा १ सय १६ घरधुरी पशु पालक किसानहरूले आफूले पालेका पशुपन्छीलाई उपचार गराउनुका साथै औषधी र परामर्श सेवा लिएका थिए ।
शिविरमा पशु चिकित्सकहरू डा.सूर्यचन्द्र थोकर, मुकुन्द खड्का, प्रकाश थापा, राम प्रवेश राम सहित परियोजनाका तर्फबाट पशु प्राविधिक लक्ष्मण श्रेष्ठ र सुविना केसीले पशुपन्छीको उपचार, औषधी वितरण र पशुपन्छी पालक किसानहरूलाई परामर्श सेवा दिएका थिए ।
वडामा नै निःशुल्क पशुपन्छीको औषधी सेवा पाएपछि स्थानीय किसानहरू खुसी भएका छन् । उनीहरूले आगामी दिनमा पनि यस्तै शिविर राख्न संघसंस्था र सरोकारवाला निकायलाई अनुरोध गरेका छन् । किसानहरूले पशुपन्छी पालन सम्बन्धी जानकारी, उपचार र औषधिको राम्रो व्यवस्था भएमा पशुपालन व्यवसायलाई निरन्तरता दिन सकिने बताएका छन् ।
शिविरमा पहाडी समाज कल्याण केन्द्र दोरम्बाका कार्यवाहक अध्यक्ष रोशन श्रेष्ठ, हेफर परियाेजना कार्यक्रम अधिकृत ठाकुर खड्का, प्रतिनिधि मुना कडेल लगायत स्थानीय जनप्रतिनिधिहरूको समेत उपस्थित रहेको थियो ।
