रामेछाप– मन्थली नगरपालिका वडा नं १ एयरपोर्र्ट क्षेत्र अन्तरगतको तामाकोशी नदी किनारमा स्थानीय महिलाहरुको सक्रियतामा सरसफाई गरिएको छ । बुधबार अन्तरराष्ट्रिय नारी दिवसको अवरमा सिगल धुप महिला समूहको सक्रियतामा पक्की पुलदेखि एयरपोर्ट सम्मको नदी किनारमा रहेको फोहोर सरसफाई गरिएको हो ।
नदी किनारमा फोहोर फाल्दा मन्थली बजारबासीले पिउने पानी दुषित हुने, वातावरण फोहोर हुने, नदी किनारमा विभिन्न कार्य गर्न समेत अफ्टेरो हुँदै गएकाले सरसफाइको अभियान थालिएको सिगल धुप महिला समूहकी अध्यक्ष समेत रहेकी स्थानीय एसोदा श्रेष्ठले बताइन् । अन्तराष्ट्रिय नारी दिवसको अवसरमा महिलाहरुको सक्रियतामा अभियान सुरु गर्दा अभियान दीगो हुनुको साथै अभियानमा सबैले साथ दिने लक्ष्यका साथ अभियान सुरु गरिएको श्रेष्ठले बताइन् ।
एयरपोर्ट क्षत्रका महिला, सशस्त्र प्रहरी बल मन्थली लगायतको सहभागितामा सरसफाई गरिएको श्रेष्ठले बताइन् । आफ्नो घर तथा विभिन्न ठाउँबाट निस्केको फोहोरलाई नदी र नदी किनारमा फाल्दा आफ्नै स्वास्थ्यमा समस्या पर्ने भएकाले त्यस्तो कार्य नगर्न आम मन्थलीबजार बासीलाई सिगल धुप महिला समूहले अनुरोध गरेको छ ।
नदी किनारबाट जम्मा गरिएको फोहोरलाई मन्थली नगरपालिकाको गाडीमा राखेर उचित ठाउँमा व्यवस्थापन गरिएको सरसफाइमा संलग्न टोलीले बताएको छ ।
