रामेछाप– रामेछापमा पहिलो पटक डुङ्गा दौड प्रतियोगिताको आयोजना हुने भएको छ । जिल्ला खेलकुद विकास समिति रामेछापले सदरमुकाम मन्थलीमा बिहिवार पत्रकार सम्मेलन गरी जेष्ठ ४ गते प्रथम खुल्ला डुङ्गा (लाउ) दौड प्रतियोगिताको आयोजना गरिने जानकारी गराइएको हो । जिल्लामा पहिलो पटक आयोजना गर्न लागिएको खुल्ला डुङ्गा (लाउ) दौड प्रतियोगिता देशमै पहिलो पटक आयोजना गर्न लागिएको आयोजकको दावी रहेको छ ।
तामाकोशी नदीको त्रिवेणी क्षेत्रमा आयोजना हुने प्रतियोगितामा माझीहरुले डुङ्गा चलाएर कोशी वारपार गर्ने र समय अवधीलाई मूल्यांकन गरी बिजेता घोषणा गरिने आयोजकले जनाएको छ । काठको डुङ्गा चलाएर प्रतिस्पर्धा गरिने भएको हुँदा परम्पराको निरन्तरता र रोचक समेत हुने जिल्ला खेलकुद विकास समिति रामेछापका प्रमुख केशब कुमार कट्टेल बताए । पत्रकार सम्मेलनमा बोल्दै जिल्ला खेलकुद विकास समिति रामेछापका अध्यक्ष सरोज घागामगरले खेल प्रतियोगितामा देशैभरीका करिव २० भन्दा बढी जिल्लाका डुङ्गा खेलाडीहरुको सहभागिता हुने बताए । उनले माझी समुदायको सिप र क्षमतालाई प्रस्फुटन गर्दै परम्परागत खेललाई संरक्षण गर्ने उद्देश्यका साथ खेल आयोजना गर्न लागिएको धारणा व्यक्त गरे ।
खेलमा सिंगल तर्फ एउटा डुङ्गामा दुई जना र डबल तर्फ एउटा डुङ्गामा चार जनाले डुङ्गा चलाउने आयोजकले बताएको छ । सिंगल तर्फ प्रथम, द्वितिय र तृतिय हुने प्रतियोगीहरुलाई क्रमशः २० हजार, १५ हजार र १० हजार पुरस्कारको साथमा मेडल तथा प्रमाणपत्र प्रदान गरिने बताइएको छ । त्यस्तै डबल तर्फ प्रथम, द्वितिय र तृतिय हुने प्रतियोगीहरुलाई क्रमशः ३० हजार, २० हजार र १० हजार नगद पुरस्कारको साथमा मेडल तथा प्रमाणपत्र प्रदान गरिने छ ।
खेलमा दुर्घटना हुन सक्ने संभावनालाई मध्यनजर गर्दै उद्धारटोली तयारी अवस्थामा राखिने आयोजकले जनाएको छ ।
माझी समुदायको बसोबास रहेका सबै जिल्लाबाट खेलमा सहभागि गराउने गरी खबर गरिसकिएको नेपाल माझी उत्थान संघ रामेछापका अध्यक्ष इन्द्रबहादुर माझील पत्रकार सम्मेलनमा जानकारी गराए ।
प्रथम खुल्ला डुङ्गा (लाउ) प्रतियोगिताका फोकल पर्सन गंगालाल गोलेले यो खेलले एउटा समुदायसँग जोडिएको संस्कारलाई जगाउन सहयोग पुग्ने विश्वास व्यक्त गरे ।
राष्ट्रिय खेलकुद परिषद्को आयोजना, रामेछाप जिल्ला खेलकुद विकास समिति रामेछापको व्यवस्थापन, मन्थली नगरपालिकाको सहयोग र नेपाल माझी उत्थान संघ रामेछापको समन्वयमा हुने प्रतियोगितको उद्घाटन राष्ट्रिय खेलकुद परिषद्का सदस्य सचिव टंकलाल घिसिङले गर्ने भएका छन् ।
