रामेछाप– रामेछाप जिल्लाको सदरमुकाम मन्थलीमा रहेको रामेछाप बहुप्राविधिक शिक्षालयले अबदेखि कृषकको घर–घरमा प्राविधिक विद्यार्थी पठाउने भएको छ । विशेष गरी कृषि र पशु विज्ञान अध्ययन गर्दै गरेका विद्यार्थीहरुलाई स्वयंसेवकको रुपमा परिचाल गर्न लागिएको हो । उनीहरुले कृषककोमा गएर तरकारी खेती र पशु पालनका विषयमा आधुनिक प्रविधि र ज्ञान सिकाउने छन् । साथै कृषकहरुका अनुभव समेत लिनेछन् । त्यसका लागि राष्ट्रिय युवा परिषदले आर्थिक सहयोग प्रदान गरेको छ ।
आईतवार कार्यक्रमको शुभारम्भ गर्दै मन्थली नगरपालिकाको नवनिर्वाचित नगर प्रमुख लव श्रेष्ठले स्वयंसेवक परिचालनले नगरको कृषि र पशुपालनको क्षेत्रमा उन्नति हुने बताए । कार्यक्रममा राष्ट्रिय युवा परिषद्का प्रमुख प्रशासकिय अधिकृत रमाकान्त शर्मा, राष्ट्रिय युवा परिषद्का उपसचिव कमला ज्ञवाली, प्राविधिक प्रशिक्षण प्रतिष्ठान सानोठिमी भक्तपुरका प्रशिक्षक उत्तम लुईटेल, राष्ट्रिय युवा परिषद्का प्रतिनिधि मिरा काफ्ले र रामेछाप बहुप्राविधिक शिक्षालय प्रमुख हरि पौडेलको उपस्थित रहेको थियो ।
