रामेछाप- तेस्रो मन्थली मेयर कप पुरुष भलिबल प्रतियोगिता सुरु भएको छ । मन्थली नगरपालिकाको आयोजनामा आइतबार सम्म संचाल हुने तेस्रो मेयर कप पुरुष भलिबल प्रतियोगिता शुक्रबार देखि सुरु भएको हो ।
रामेछाप सदरमुकाम मन्थली स्थिति जिल्ला समन्वय समिति रामेछापको प्राङ्गणमा नगर प्रमुख रमेश कुमार बस्नेतले उद्घाटन गरेर प्रतियोगिताको सुरु गरेका हुन् । तेस्रो मेयर कपको उद्घाटनमा शुभकामना मन्तव्य राख्दै नगर प्रमुख बस्नेतले जिल्लाको सदरमुकाम समेत रहेको मन्थली नगरपालिकालाई खेलकुदकै माध्यमबाट चिनाउने गरी नगरपालिका लागेको बताए । तीन वर्ष अघिदेखि सुरु भएको मेयर कपलाई निरन्तर रुपमा संचालन गर्दा खेलकुदको क्षेत्रमा धेरै विकास हुँदै गएको र भविष्यमा मेयर कप लगायतका खेलकुदलाई निरन्तरता दिने नगर प्रमुखले प्रतिवद्धता व्यक्त गरे । उनले खेलकुदको समग्र विकासको लागि नगरबाट प्रयप्ता वजेट विनियोजन गरेर अगाडि बढ्ने धारणा राखे ।
कार्यक्रममा नगर उपप्रमुख माया कुमारी कार्की, रामेछापका प्रमुख जिल्ला अधिकारी दिपक कुमार पाहाडी, जिल्ला खेलकुद विकास समिति रामेछापका अध्यक्ष राजेश श्रेष्ठ, मन्थली नगर खेलकुद विकास समितिका उपाध्यक्ष गोपाल माझी लगायतले अ–आफ्नो भनाई राखेका थिए ।
प्रतियोगितामा मन्थली नगरपालिकाका १४ वटा वडाबाट टिमले भाग लिएका छन् । शुक्रबारदेखि सुरु भएको प्रतियोगितामा शुक्रबार वडा नम्बर २ र वडा नम्बर ४ (सालु) बिच भएको खेलमा सालुले जितेको छ । त्यस्तै वडा नम्बर ५ (सुनारपानी) र वडा नम्बर १४ (फुलासी) बिच भएको खेलमा फुलासीले जितेको छ । त्यसैगरी मन्थली नगरपालिका वडा नम्बर ६ (भलुवाजोर) र वडा नम्बर ९ (पुरानागाँउ) बिचमा भएको प्रतिस्पर्धामा भलुवाजोरले जित हासिल गरेको छ । त्यसैगरी वडा नम्बर ३ (कठजोर) र वडा नम्बर ११ (गेलु नाटिला) बिच भएको खेलमा गेलु नाटिलाले जितेको छ । आजै सम्पन्न भएको वडा नम्बर ७ (भटौली) र वडा नम्बर १० (चनखु) को खेलमा भटौलीले जितेको छ । यसैगरी मन्थली १ (मन्थली) र वडा नम्बर १३ (फुलासी) बिच भएको प्रतिस्पर्धामा मन्थली १ ले जितेको छ । त्यसैगरी आजै भएको दोस्रो सेटको भलिबल प्रतियोगितामा मन्थली नगरपालिका वडा नम्बर ४ (सालु) र वडा नम्बर ५ (सुनारपानी) बिच भएको खेलमा सुालुले जित हासिल गरेको छ । दोस्रो सेट अन्तरगत मन्थली नगरपालिका २ (कठजोर) र मन्थली १४ (फुलासी) बिचको खेलमा फुलासीले जित निकालेको छ भने मन्थली ९ (पुरानागाँउ) र मन्थली ११ (गेलु नाटिला) बिच भएको प्रतिस्पर्धामा गेलु नाटिलाले जित हासिल गरेको छ । नौवटा प्रतिस्पर्धा सँगै आज प्रतियोगिता सकिएको छ । शनिबार सेमिफाइनल चरणका खेलहरू हुने बताइएको छ ।
आफ्नो प्रतिकृया दिनुहोस्