रामेछाप- उज्यालो नेपाल पार्टीले रामेछाप जिल्लामा आफ्नो राजनीतिक अभियानलाई तीव्र बनाउने भएको छ । जिल्लामा पार्टी संगठन विस्तार गर्दै औपचारिक रूपमा राजनीतिक गतिविधि अघि बढाउने उद्देश्यसहित पार्टी कार्यालय स्थापना गर्न लागिएको हो ।
यसै सन्दर्भमा शनिबार सदरमुकाम मन्थलीमा आयोजित पत्रकार सम्मेलनमार्फत पार्टीले रामेछापमा संगठन विस्तारको औपचारिक घोषणा गरेको हो । पत्रकार सम्मेलनमा बोल्दै उज्यालो नेपाल पार्टीका नेता रामकृष्ण लामाले आगामी पुस ७ गते सोमबार मन्थलीमा पार्टीको पहिलो जिल्ला भेला आयोजना गरिने जानकारी दिए । नेता लामाका अनुसार उक्त भेलालाई सम्बोधन गर्न प्रमुख अतिथिका रूपमा उर्जा, जलस्रोत तथा सिँचाइ मन्त्री कुलमान घिसिङ आउने तय भएको छ । भेलाकै अवसरमा उज्यालो नेपाल पार्टीको जिल्ला पार्टी कार्यालयको उद्घाटन समेत गरिने उनले बताए । कार्यालय उद्घाटनपछि पार्टीले रामेछापका सबै पालिकामा संगठन विस्तार अभियान सञ्चालन गर्ने योजना बनाएको छ ।
पत्रकार सम्मेलनमा बोल्दै नेता लामाले उज्यालो नेपाल पार्टीको मुख्य उद्देश्य देशको आर्थिक रूपान्तरण गर्नु र विद्यमान राजनीतिक तथा सामाजिक व्यथितिको अन्त्य गर्नु रहेको स्पष्ट पारे । उनले हालको राजनीतिक व्यवस्थाप्रति जनतामा बढ्दो निराशा रहेको उल्लेख गर्दै त्यसको विकल्पका रूपमा उज्यालो नेपाल पार्टी उदाएको दाबी गरे । “रामेछापमा हाम्रो पार्टीको राजनीतिक भविष्य उज्यालो देखिन्छ,” उनले भने, “यहाँका युवाहरू परिवर्तनको खोजीमा छन्, त्यसलाई उज्यालो नेपाल पार्टीले नेतृत्व गर्नेछ ।”
कार्यक्रममा उज्यालो नेपाल पार्टीका युवा नेता राज मैनालीले पनि आफ्नो धारणा राख्दै राजनीतिमा नयाँ युगको सुरुवात गर्न नवयुवालाई संगठित गर्दै पार्टीमा सहभागी गराइने बताए । उनले नेपालको राजनीतिमा सुधार ल्याउन युवा पुस्ता जाग्नुपर्ने आवश्यकता औंल्याए । “पुरानै सोच र कार्यशैलीले देशलाई अगाडि बढाउन सक्दैन,” उनले भने, “अब युवाहरूले नै राजनीतिमा हस्तक्षेप गर्नुपर्ने समय आएको छ ।”
पत्रकार सम्मेलनमा सहभागी नेताहरूले उज्यालो नेपाल पार्टीले पारदर्शी, जवाफदेही र विकासमुखी राजनीति गर्ने प्रतिबद्धता व्यक्त गरे । रामेछापजस्तो भौगोलिक रूपमा विकट तर सम्भावनायुक्त जिल्लामा ऊर्जा, कृषि, पर्यटन र रोजगारीका क्षेत्रमा नयाँ सोचसहित काम गरिने उनीहरूको भनाइ थियो ।
