रामेछाप– रामेछापको दोरम्बामा २० औँ दोरम्बा स्मृति दिवस बिहीबार आयोजना हुने भएको छ । रामेछापको दोरम्बामा २०६० साल साउन ३२ गते तत्कालीन नेकपा माओवादीका नेता तथा कार्यकर्ताहरूलाई तत्कालीन शाही नेपाली सेनाले नियन्त्रणमा लिई डाँडाकटेरी भन्ने ठाउँमा लगेर हत्या गरेको थियो । दाङ जिल्लाको हापुरेमा सरकार र विद्रोही माओवादीबिच शान्तिबार्ता चलिरहेको बेला दोरम्बा घटना घटेपछि वार्ता नै भङ्ग भएको थियो भने माओवादी र सेनाबिचको द्वन्द्व चर्किएर ठुलो क्षति हुन पुगेको थियो । शान्ति वार्ताको उपयोग गर्दै माओवादीहरू दोरम्बा गाउँका स्थानीय शिक्षक युवराज मोक्तानको घरमा बसिरहेको बेला उनीहरूलाई सेनाले घेरा हालेर समातेको थियो । त्यसपछि शाही नेपाली सेनाले डाँडाकटेरी भन्ने ठाउँमा लगेर गोली हानी १९ जना ओवादी कार्यकर्ता, शिक्षक युवराज मोक्तान र उनका छोरा समेत २१ जनाको हत्या गरेको थियो। तत्कालीन माओवादी रामेछापका जनसरकार प्रमुख बाबुराम लामा सहित जिल्ला तथा क्षेत्र स्तरका नेता तथा कार्यकर्ताहरूको हत्या भएको यो घटनालाई विश्व समुदायले चासोका साथ लिएको थियो। दोरम्बा घटनालाई अहिले पनि मानवता विरुद्धको घटनाको रूपमा लिइन्छ। अहिले दोरम्बामा २१ जनाको स्मृतिमा सालिक बनाइएको छ। दोरम्बा घटनालाई राष्ट्रिय तथा अन्तर्राष्ट्रिय मानव अधिकारवादी संघसंस्थाले अनुसन्धान गरेका थिए।
२० औँ दोरम्बा स्मृति दिवसलाई सम्बोधन गर्न प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्ड बिहीबार दोरम्बा आउने भएका छन् । नेकपा माओवादी केन्द्र दोरम्बाका इन्चार्ज कमानसिंह मोक्तानले कार्यक्रमको तयारी पुरा भएको र अध्यक्ष प्रचण्डसँगै माओवादी केन्द्रका,केन्द्र तथा प्रदेश स्तरका नेताहरू दोरम्बा आउने जानकारी दिए ।
यसै गरी सोही कार्यक्रममा नेकपा माओवादी केन्द्र दोरम्बाले प्रकाशन गरेको समाजवादको यात्रा नामक पुस्तकको विमोचन गर्ने कार्यक्रम समेत रहेको माओवादी केन्द्र दोरम्बाका सह इन्चार्ज अम्बिकाप्रसाद गजुरेलले जानकारी दिए ।
