रामेछाप- बामती प्रदेशका सबै स्थानीय तहमा गरिएको कार्यसम्पादन मूल्याङ्कनमा रामेछाप जिल्लाको मन्थली नगरपालिका चोथौ र रामेछाप नगरपालिका पाँचौ भएका छन् । प्राकृतिक स्रोत तथा वित्त आयोगले सार्वजनिक गरेको कार्य सम्पादन मूल्याङ्कन प्रतिवेदनमा बागमती प्रदेशका १ सय १९ स्थानीय तहमध्ये मन्थली नगरपालिका चौथो र रामेछाप नगरपालिका पाँचौ नम्बरमा देखिएका हुन । मन्थली नगरपालिकाले ६८ दशमलव ०७ अंक प्राप्त गरेको छ भने रामेछाप नगरपालिकाले ६७ दशमलव ४२ अंक प्राप्त गरेका छ । प्रतिवेदन अनुसार जिल्लाका ८ पालिका मध्ये मन्थली नगरपालिका पहिलो हुँदा रामेछाप नगरपालिका दोस्रो भएको छ । सिन्धुलीको दुधौली नगरपालिकाले बागमती प्रदेशमा सबै भन्दा बढी ७४ दशमलव ४५ अंक प्राप्त गरी प्रदेशकै पहिलो स्थानीय तह भएको छ ।
यता गोकुलगंगा गाउँपालिकाले ६५ दशमलव ३९, सुनापति गाउँपालिकाले ६१ दशमलव २१, उमाकुण्ड गाउँपालिको ५२ दशमलव ९०, दोरम्बा शैलुङ्ग गाउँपालिकाले ५३ दशमलव १३, खाँडादेवी गाउँपालिकाले ४६ दशमलव ७९ र लिखुतामाकोशी गाउँपालिकाले ३८ दशमलव ३१ अंका प्राप्त गरेको छ ।
प्रतिवेदन अनुसार कार्यसम्पादन मूल्याङ्कनमा ७ सय ५३ ओटा स्थानीय तह मध्ये बाँकेको नैनापुर गाउँपालिकाले सबै भन्दा बढी ७८ दशमलव ५१ अंक ल्याएर देशकै पहिलो स्थानीय तह भएको छ ।
उल्लेखित कार्यसम्पादन मूल्याङ्कन गएको आर्थिक वर्ष २०७८/०७९ को भएको प्राकृतिक स्रोत तथा वित्त आयोगका प्रवक्ता ज्ञानेन्द्र पौडेलले बताए । हाम्रो प्रहार डटकमसँग कुरा गर्दै प्रवक्ता पौडेलले भने– ‘प्रदेश तथा स्थानीय तहको कार्यसम्पादन मुल्यांकन कार्यविधि, २०७८ को दफा ७ को अधिनमा रही प्रदेश तथा स्थानीय तहको लागि निर्धारण गरिएका कार्यसम्पादन सुचकको मुल्यांकन गरी अंक प्रदान गरिएको हो । यदि उक्त अंकमा चित्त नबुझेमा सोही कार्यविधिको दफा ९ अनुसार यो सुचना प्रकाशित भएको मितिले ७ दिनभित्र आवश्यक प्रमाण सहित पुनरावलोकनका लागि आयोग समक्ष अनुसुची ५ को ढाँचामा आयोग पठान सक्नु हुनेछ । त्यसलाई हामीले पुनः हेर्छौ ।’
राष्ट्रिय प्राकृतिक स्रोत तथा वित्त आयोगले विभिन्न १७ वटा सूचकलाई आधार बनाएर स्थानीय तहको कार्यसम्पादन मूल्याङ्कन गर्दै आएको छ ।
