रामेछाप– रामेछापका तीन महाधिवेशन प्रतिनिधिले नेपाली काँग्रेसको केन्द्रीय सदस्यमा उम्मेदवारी दिने घोषणा गरेका छन् । रामेछापबाट महाधिवेशन प्रतिनिधि जितेर केन्द्रीय महाधिवेशनमा भाग लिन काठमाण्डौ पुगेका तीन जना महाधिवेशन प्रतिनिधिहरूले केन्द्रीय सदस्यको उम्मेदवार बन्ने घोषणा गरेका हुन् । केन्द्रीय सदस्यको उम्मेदवारी घोषणा गर्नेमा नेपाली काँग्रेस रामेछापको पूर्व सभापति समेत रहेका रामचन्द्र खड्का, काँग्रेस नेता मुक्त बहादुर महते र कलकारिताबाट काँग्रेस राजनीतिमा आएका प्रकाश कटुवाल रहेका छन् ।
उनीहरूले आफ्नो फेसबुक मार्फत केन्द्रीय सदस्य बन्ने इच्छा व्यक्त गर्दै उम्मेदवारी घोषणा गरेका हुन् । रामचन्द्र खड्काले २०२८ सालदेखि नेविसंघ हुँदै २०८३ मा आएर केन्द्रीय महाधिवेशन प्रतिनिधि सम्ममा आइपुग्दा काँग्रेसका हरेक परिवर्तनका अभियानमा आफू अनुकूल हुँदै गएको र अहिले बदलिएको काँग्रेसमा आफूले केन्द्रीय सदस्यमा उम्मेदवारी दिने घोषणा गरेका छन् ।
त्यस्तै अर्का महाधिवेशन प्रतिनिधि मुक्त बहादुर महतेले पनि दलित तर्फबाट केन्द्रीय सदस्यको उम्मेदवार बन्ने घोषणा गरेका छन् । उनले फेसबुकमा आफू केन्द्रीय सदस्यको उम्मेदवार बनेको बताउँदै महाधिवेशन प्रतिनिधिहरूसँग भोटको अपिल समेत गरेका छन् ।
अर्का महाधिवेशन प्रतिनिधि प्रकाश कटुवालले पनि केन्द्रीय सदस्यको उम्मेदवार बन्ने बताएका छन् । उनले आफ्नो फेसबुक पेज मार्फत काँग्रेसको केन्द्रीय सदस्य बन्ने भन्दै उम्मेदवारी घोषणा गरेका छन् । उनले पनि महाधिवेशन प्रतिनिधिहरूसँग भोटको अपिल गरेका छन् ।
रामेछापबाट ३४ जना केन्द्रीय महाधिवेशन प्रतिनिधि निर्वाचित भएका छन् । नेपाली काँग्रेसको १५औँ महाधिवेशन आइतबारदेखि सुरु भइसेको छ भने २० गते उम्मेदवारहरूले मनोनयन दर्ता गर्ने कार्यतालिका रहेको छ ।
रामेछापबाट हाल सम्म तीन जनाले उम्मेदवारी घोषणा गरेपनि अन्य महाधिवेशन प्रतिनिधिहरूले पनि केन्द्रीय सदस्यमा उम्मेदवारी घोषणा गर्ने तयारी गिरहेका काँग्रेस नेताहरूले बताएका छन् ।
