रामेछाप- खाँडादेवी गाउँपालिकाका अध्यक्ष ज्ञानकुमार श्रेष्ठले सुनकोशी किनारमा राती–राती हुने गरेको अबैध बालुवा तस्करी रोक्न गस्ती नै गर्न थालेका छन् । खाँडादेवी गाउँपालिका वडा नं १ राकाथुमको खैरेनी पुल नजिक सुनकोशी नदी किनारमा दैनिक जसो नै रातको समयमा अबैध रुपमा बालुवा तस्करी हुन थालेपछि गाउँपालिका अध्यक्षले प्रहरी सहित तस्करी रोक्न गस्ती गर्न थालेका हुन् ।
विहिबार राती नदी किनारबाट स्काभेटर प्रयोग गरी दर्जनौ ट्रकमा अबैध रुपमा गिटी, बालुवा र ढुंगा उत्खनन् गरेर तस्करी भइरहेको खबर पाएपछि अध्यक्ष श्रेष्ठले आफ्नो फेसबुक पेज मार्फत तस्कर भइरहेको भिडियो लाइभ गर्दै खैरेनी पुगेर तीन ओटा ट्रक र दुई ओटा स्काइभेटर नियन्त्रणमा लिएका छन् ।
मध्यरातमा कोशी किनारमा पुगेका अध्यक्षले बलुवा तस्करी भइरहेको दृश्य आफ्नो फेसबुक पेजमा भिडियो राखेका छन् । लाइभ भिडियोमा अध्यक्ष श्रेष्ठले निर्माणाधिन मध्यपहाडी राजमार्ग र कोशीको बहाव क्षेत्रलाई नै असर गर्ने गरी तस्करी भइरहेको बताएका छन् । नदीजन्य बस्तु उत्खननमा प्रयोग भएको स्काइभेटरको भिडियो देखाउँदै अध्यक्ष श्रेष्ठले एकदुई जना तस्करी गर्ने व्यक्तिलाई जोगाउने कि ?, राष्ट्रको धन जोगाउने ? भन्दै प्रश्न समेत गरेका छन् ।
यस अघि पनि पटक–पटक नदी जन्य बस्तु चोरी हुने गरेको सूचना आएको र त्यस्तो अवैध रुपमा काम नगर्न सम्बन्धित व्यक्तिहरुलाई अनुरोध गर्दा समेत चोरी नरोकिएपछि बाध्य भएर प्रहरीको सहायतामा बालुवा तस्कर रोक्न नदी किनारमै पुग्नु परेका अध्यक्ष श्रेष्ठले बताए ।
कानूनी प्रक्रिया मिलेपछि बैधानिक रुपमै निकाल्न मिल्ने नदी जन्य बस्तु केही व्यक्तिले अवैध रुपमा चोरी गरीरहेको बताउँदै अध्यक्ष श्रेष्ठले भने– ‘खाँडादेवी गाउँपालिका भित्र रहेका नदी जन्य बस्तुको वैधानिक रुपमा नै निकासी गर्न सकिने गरी गाउँपालिकाले टेन्डर खोलेको छ । त्यसमा सहभागी भएर राज्यलाई कर तिरेर नदी जन्य बस्तु निकाल्नुको सट्टा अबैध रुपमा केही व्यक्तिले राती–राती चोरेर लानु राम्रो हैन् । त्यसैले म राती–राती नदी किनारमा गस्ती गर्न बाध्य भएँ ।’
नदी जन्य बस्तुको अवैध रुपमा चोरी निकासीको काम देशैभरी भइरहेको बताउँदै अध्यक्ष श्रेष्ठले अब पनि यस्तो अवैध धन्दा नरोक्ने हो भने देशलाई ठूलो नोक्सानी हुने धारणा राखे ।
रातको समयमा हुने चोरीलाई रोक्ने काम एक दिनको मात्रै नभएर चोरी नरोकिए यो कार्य अब नियमित बनाउने अध्यक्ष श्रेष्ठले बताए । उनले यो अभियानमा प्रहरी–प्रशासन, स्थानीय नागरिक, कर्मचारी, पत्रकार लगायत सरोकारवालालाई सहयोग गर्न आग्रह गरेका छन् ।
उनले खाँडादेवी गाउँपालिकालाई आफ्नै पालामा सुशासनमैत्री पालिका बनाउने अभियानमा लागेको पनि बताए ।
यसरी भएको थियो सुनकोशी नदीमा नदी जन्य बस्तुको चोरी
