रामेछाप- १५ महिना देखि १५ वर्ष उमेर समूहका बालबालिकालाई लक्षित गरी संचालन गर्न लागिएको टाइफाइड विरुद्धको खोप अभियान रामेछापमा चैत्र ३० गतेबाट सुरु हुने भएको छ । जिल्ला स्तरीय खोप समन्वय समितिको बिहिवार बसेको बैठकले सरकारले पहिलो पटक अभियानका रुपमा निःशुल्क रुपमा संचालन गर्न लागेको खोप अभियान रामेछापमा चैत्र ३० गतेबाट संचालन गरिने निर्णय गरेको हो ।
प्रमुख जिल्ला अधिकारी एवं जिल्ला स्तरीय खोप समन्वय समितिका संयोजक दीपक कुमार पहाडीको अध्यक्षतामा बसेको बैठकले खोप अभियानलाई प्रभावकारी बनाउने गरी चैत्र ३० गते देखि बैशाख ९ गते सम्म दुई चरणमा खोप अभियान संचलान हुने निर्णय गरेको छ ।
बैठकमा खोप अभियानको बारेमा जानकारी गराउँदै स्वास्थ्य कार्यालय रामेछापका प्रमुख जितेन्द्र शाहले दुई चरणमा खोप अभियान संचालन हुने जानकारी गराए । शाहका अनुसार पहिलो चरणमा चैत्र ३० गते देखि बैशाख ४ गते सम्म उमाकुण्ड, दोरम्बा शैलुङ्ग, गोकुलगंगा र सुनापति गाउँपालिकामा अभियान संचालन हुने छ भने दोस्रो चरणमा बैशाख ६ गते देखि ९ गते सम्म मन्थली नगरपालिका, रामेछाप नगरपालिका, खाँडादेवी गाउँपालिका र लिखुतामाकोशी गाउँपालिकामा संचालन हुने छ ।
रामेछापमा करिव ४४ हजार ४ सय १७ जना लक्षित समूहका (१५ महिना देखि १५ वर्ष उमेर समूह) बालबालिकालाई २ सय ९० खोप केन्द्रबाट खोप लगाइने स्वास्थ्य प्रमुख शाहले बताए । १ सय २५ जना भन्दा बढी विद्यार्थीहरु अध्ययनरत रहेको विद्यालयहरुलाई खोप केन्द्र बनाउने र त्यो भन्दा कम विद्यार्थी संख्या भएका विद्यालयहरुलाई मर्ज गरेर केन्द्र तोकिने पनि शाहले बताए ।
प्रमुख जिल्ला अधिकारी एवं जिल्ला स्तरीय खोप समन्वय समितिका संयोजक दीपक कुमार पहाडीले खोप अभियानलाई सफल पार्न सबै लाग्नु पर्ने बताए । प्रजिअ पहाडीले निर्वाचनको मिति नजिकिदै गएको स्मरण गराउँदै त्यस्तो अवस्थामा अभियानमा असर पर्न सक्ने र बालबालिका खोप अभियानबाट छुट्न सक्ने भएकाले स्वास्थ्य कार्यालयले बढी संवेदनशिलता अपनाएर काम गर्नु पर्ने धारणा राखे ।
बिहीवार प्रधानमन्त्री शेर बहादुर देउवाले खोप अभियानको शुभारम्भ गरेका थिए । नेपालमा झण्डै ७५ लाख बालबालिकालई पहिलो पटक टाइफाइड विरुद्धको निःशुल्क खोप लगाउने अभियानमा सरकार रहेको छ ।
