रामेछाप– रामेछाप सदरमुकाम मन्थलीमा संचालन भइरहेको तेस्रो मन्थली मेयर कप पुरुष भलिबल प्रतियोगितामा शनिबार ११ टिमले खेल खेलेका छन् । सो खेल अन्तरगत लिग चरणबाट ६ वटा टिम बाहिरिएका छन् । जसमा मन्थली नगरपालिका वडा नम्बर ५ (सुनारपानी), वडा नम्बर २ (टेकानपुर), वडा नम्बर ९ (पुरानागाउँ), वडा नम्बर ६ (भलुवाजोर), वडा नम्बर १२( गेलु) र वडा नम्बर १३ (फुलासी) रहेका छन् । यसैगरी पहिलो क्वाटर फाइनलबाट बाहिरिनेमा मन्थली नगरपालिका वडा नम्बर १४ (फुलासी) र वडा नम्बर ८ (चिसापानी) रहेको छन् ।
आइतबार समूह (ग) को विजेता मन्थली ७ भटौली र समूह (क) को उपविजेता मन्थली ४ (सालु) ले क्वाटर फाइनल खेलमा प्रतिस्पर्धा गर्ने छन् । दोस्रो क्वाटर फाइनलमा मन्थली १ र मन्थली ३ (कठजोर) खेल्ने छन् । त्यसबाट विजयी टिमले सेमिफाइनल खेल खेल्न पाउनेछन् । उपविजेता बने खेलबाट बाहिरिने छन् । आइतबारनै सेमिफाइनल खेल हुनेछ जसमा पहिलो सेमिफाइनल वडा नम्बर ११ (नाटिला) र वडा नम्बर १० (चनखु) बिच हुनेछ । सेमिफाइनलमा उपविजेता बन्ने टिमले तेस्रो स्थानका लागि भिड्ने छन् भने सेमिफाइनलका दुवै विजेता टिमले फाइनल चरणमा पहिलो र दोस्रो स्थानको लागि भिड्ने छन् ।
मन्थली तेस्रो मेयर कप पुरुष भलिबल प्रतियोगितामा ए.भी.सी.ईन्टरनेशनल रेफ्री विकास गुरूङ, भलिबलका राष्ट्रिय निर्णायक खुम गाउँले मगर, राष्ट्रिय रेफ्री मनिक तामाङ र प्रदेश रेफ्री शुक्र बहादुर माझी लगाएत खेल प्रशिक्षकहरूको उपस्थितिमा प्रतियोगिता संचालन भइरहेको मन्थली नगर खेलकुद विकास समितिका उपाध्यक्ष गोपाल माझीले जानकारी दिए । आइतबारनै एक औपचारिक कार्यक्रमका बिच तेस्रो मन्थली मेयर कप पुरुष भलिबल प्रतियोगिता समापन गरिने आयोजक मन्थली नगरपालिकाले बताएको छ ।
