रामेछाप– रामेछाप र ओखलढुंगा दुई जिल्लालाई जोड्ने झोलुङ्गे पुलको निर्माण सम्पन्न भई शुक्रबार देखि संचालनमा आएको छ । रामेछापको रामेछाप नगरपालिका वडा नं ४ लखनटार स्थित लिखु नदीमा निर्माण भएको लखनटार झोलुङ्गे पुल उद्घाटन भएसँगै संचालनमा आएको हो ।
संघीय सरकारको आर्थिक सहयोग तथा रामेछाप नगरपालिकाको प्राविधिक सहयोगमा निर्माण भएको झोलुङ्गे पुल रामेछाप नगरपालिकाका नगर प्रमुख नर बहादुर थापामगरले उद्घाटन गरेका छन् ।
पुल उद्घाटन गर्दै नगर प्रमुख थापामगरले लिखु नदीमा पुल नहुँदा धेरै समय लगाएर लामो यात्रा गरेर आवातजावात गर्नु पर्ने बाध्यता हटेको बताए । उनले रामेछाप र ओखलढुंगाका नागरिकहरुको सहजताको लागि बनाइएको झोलुङ्गे पुल बने पछि ओखलढुंगाको चम्पदेवी गाउँपालिकाको वडा नं. १, २ र रामेछाप नगरपालिकाको वडा नं ४ र ५ का स्थानीयलाई आवतजावतमा सहज भएको बताएका छन् ।
दुई वर्ष अघि देखि निर्माण कार्य सुरु भएको लखनटार झोलुङ्गे पुल निर्माणको लागि ४० लाख ५५ हजार ४ सय २९ रुपैयाँ खर्च भएको छ । पुलको लम्बाई ८६ मिटर ६० सेन्टिमिटर रहेको छ ।
