रामेछाप- मन्थलीमा आगलागीबाट हुने क्षतिलाई कम गर्न अग्नि नियन्त्रण (फायर फाइटिङ) सम्बन्धी तीन दिने तालिम सम्पन्न भएको छ । विपद् व्यवस्थापनका लागि पूर्वतयारी, जोखिम न्यूनीकरण, प्रतिकार्य र पुनःस्थापना जस्ता कार्यको व्यवस्थापन हुन नसक्दा आगलागीको जोखिम बढ्दै गएकाले मन्थली नगरपालिका र नागरिक उड्यन कार्यालयको सहयोगमा सशस्त्र प्रहरी बल रामेछापले फायर फाइटिङ तालिम सञ्चालन गरेको हो ।
तीन दिन सम्म चलेको तालिममा सशस्त्र प्रहरी, जनपथ प्रहरी, नेपाली सेना, मन्थली नगरपालिकाका नगर प्रहरी, नेपाल रेडक्रस सोसाइटीका कर्मचारी, जिल्ला बन कार्यालयका कर्मचारी, नागरिक उड्यन कार्यालयका कर्मचारी, रासमका प्रतिनिधि सहित ३५ जनाले विपद् व्यवस्थापनको लागि पूर्व तयारी, जोखिम न्यूनीकरण, प्रतिकार्य र पुनःस्थापना जस्ता कार्यको अभ्यास सहितको पूर्ण जानकारी लिएका छन् ।
मन्थली नगरपालिकाका नगर प्रमुख रमेश कुमार बस्नेतले जोखिमयुक्त सहरी क्षेत्र र सुखग्रस्त ग्रामिण बस्तीहरुमा विपद् जोखिम न्यूनीकरण तथा आपतकालीन प्रतिकार्य क्षमता अभिवृद्धिका लागि तालिम महत्वपूर्ण रहेको बताए । नगर प्रमुख बस्नेतले मन्थली नगरपालिकामा रहेको दमकल र विभिन्न कार्यालयमा अग्नि नियान्त्रणका लागि राखिएका उपकरणहरुलाई दक्ष जनशक्ति नहुँदा प्रयोग गर्न नसक्दा पनि आगलागीबाट ठूलो क्षति हुने गरेको बताउँदै यो तालिमले त्यस्लाई न्यूनिकरण गर्ने विश्वास व्यक्त गरे । मानविय त्रृटि र प्राकृतिक रुपमा हुने विपद्लाई न्यूनिकरण गर्न मन्थली नगरपालिका र रामेछाप नगरपालिका सहकार्य गरेर अगाडी बढ्ने उनले बताए । आगलागीबाट हुने क्षतिलाई कम गराउन सहयोग पुग्ने फायर फाइटिङ तालिम मन्थली नगरपालिकाका सबै वडामा लैजने योजना रहेको नगर प्रमुखको भनाई रहेको छ ।
निमित्त प्रमुुख जिल्ला अधिकारी लिलाराम सुनुवारले जिल्लामा हुने विभिन्न आगलागीका घटनाहरुलाई तत्काल नियान्त्रणमा लिन नसक्दा ठूलो जनधनको क्षेतिलाई कम गराउन अग्नि नियान्त्रण सम्बन्धी तालिमले सहयोग पुग्ने बताए । प्राकृतिक रुपमा हुने विपद्लाई पूर्ण रुपमा नियान्त्रणमा लिन नसकिने भएकाले त्यस्ता घटनाको प्रतिकार्य र पुनःस्थापनामा बढी ध्यान दिनु पर्ने उनको भनाई रहेको छ ।
आफू जिल्लामा आए देखि नै आगलागीका घटनाबाट मानविय क्षति सहित ठूलो मात्रमा धनमालको समेत क्षति भएकाले त्यसलाई न्यूनिकरण गर्न मन्थली नगरपालिकाको आर्थिक सहयोग, नागरिक उड्यन कार्यालय लागयतका कार्यालयहरुको सहयोगमा तालिम संचालन गरिएको सशस्त्र प्रहरी बल रामेछापका प्रहरी नायव उपरिक्षक केशव राज प्याकुरेलले बताए ।
तीन दिन सम्म संचालन भएको तालिमले अग्नि नियान्त्रण मात्रै नभएर विभिन्न विपद् न्यूनिकरण गर्न समेत सहयोग पुगेको रासमबाट सहभागी नविन कार्कीले बताए । उनले यस्तो तालिम सिमित मानिसहरुलाई मात्रै नभएर आगामी दिनमा सबै स्थानीय तहका सबै वडाका युवा क्लबका प्रतिनिधिहरुलाई दिदा थप प्रभावकारी हुने बताए ।
तालिम बुधबार देखि सुरु भएर शुक्रबार सकिएको हो ।
