रामेछाप- नेपाली काँग्रेस रामेछाप प्रदेशसभा ‘क’बाट प्रदेश अधिवेशन प्रतिनिधिका उम्मेदवार कृष्णकुमार कार्कीले जिल्ला निर्वाचन समितिले सार्वजनिक गरेको अन्तिम मतपरिणामप्रति असन्तुष्टि जनाउँदै नेपाली काँग्रेस केन्द्रीय निर्वाचन समितिमा निवेदन दर्ता गराएका छन् ।
कार्कीले मतगणनाका क्रममा आफ्ना प्रतिनिधिले टिपोट तथा जोड गरेको मतपरिणाम र जिल्ला निर्वाचन समितिले सार्वजनिक गरेको अन्तिम मतपरिणाम फरक रहेको दाबी गर्दै पुनः मतगणनाको मागसहित केन्द्रीय निर्वाचन समितिमा निवेदन दिएका हुन् ।
उनले मतगणनामा खटिएका आफ्ना प्रतिनिधिले निकालेको परिणामअनुसार आफू निर्वाचित हुनुपर्ने भए पनि जिल्ला निर्वाचन समितिले सार्वजनिक गरेको अन्तिम परिणाममा आफूलाई निर्वाचित सूचीमा नराखिएको भन्दै त्यसप्रति आपत्ति जनाइएका हुन। उनले मतपत्र पुनः गणना गरी वास्तविक परिणाम सार्वजनिक गर्न माग गरेका छन् ।
यता, रामेछाप जिल्ला निर्वाचन समितिले प्रदेशसभा ‘क’बाट खुला प्रदेश अधिवेशन प्रतिनिधितर्फ १६ जना उम्मेदवारमध्ये आठ जना निर्वाचित भएको परिणाम सार्वजनिक गरिसकेको छ । सार्वजनिक परिणामअनुसार कृष्णकुमार कार्की निर्वाचित हुने आठ जनाको सूचीमा परेका छैनन् ।
जिल्ला निर्वाचन समितिले भने मत परिणाम कम्प्युटरमा प्रविष्ट गर्ने क्रममा एक मुठाको मत भुलवश दोहोरिएर इन्ट्री भएको र त्यसपछि अर्को बास्तविक मत इन्ट्री गरी सच्याएर सार्वजनिक गरिएको जनाएको छ । समितिले यसबारे सूचना जारी गर्दै मत परिणाम सार्वजनिक गरेको थियो ।
