रामेछाप- रामेछाप जिल्लाको उत्तरी क्षेत्र, हिमाली भूगोलमा अवस्थित उमाकुण्ड गाउँपालिका वडा नम्बर १ को ङेजि क्षेत्रस्थित छेबुक ताल फुटेको आशंका गरिएको छ । पछिल्ला दिनहरूमा भएको लगातारको वर्षासँगै शनिबार साँझ छेबुक खोलामा लेदो मिसिएको ठुलो बाढी आउँदा सो ताल फुटेको हुनसक्ने आशंका गरिएको हो ।
स्थानीयवासी र घटनास्थल नजिकै रहेका व्यक्तिहरूले सामान्य अवस्थामा यस्तो प्रकारको बाढी नआउने जनाउँदै यसपटक भने ताल नै फूटेझैं देखिएको जानकारी दिएका छन् । भिजन इनर्जी एण्ड पावर लिमिटेडका सामाजिक परिचालक लाक्पा शेर्पाले बताएअनुसार, “केही दिनदेखिको अबिरल वर्षाको असर हुनसक्छ, तर खोलामा आएको लेदोसहितको बाढीले छेबुक ताल नै फूटेको संकेत गरेको छ ।” उनका अनुसार पहिले निरन्तर वर्षा हुँदा पनि यति ठूलो र लेदोयुक्त बाढी कहिल्यै देखिएको थिएन । शेर्पाकै भनाइअनुसार ताल भएको स्थानसम्म तत्काल पुग्न सक्ने अवस्था नरहेकाले ताल फुटेको कुरामा निश्चित हुन सकिएको छैन् ।
घटनास्थलमा प्रहरी खटिएको र घटनास्थलको निरीक्षण गर्दै बाढीको कारण, क्षति विवरण संकलन तथा ताल फुटेको हो वा होइन भन्ने विषयमा प्रारम्भिक अनुसन्धान भइरहेको बताइएको छ ।
बाढीको प्रत्यक्ष असर नुप्छे जलविद्युत आयोजनामा परेको छ । भिजन इनर्जी एण्ड पावर लिमिटेडले प्रवर्द्धन गरिरहेको ५७.५ मेगावाट क्षमताको नुप्छे जलविद्युत आयोजनाको लिखु साइटमा रहेको इन्टेक संरचनामा ठुलो क्षति पुगेको सामाजिक परिचालक शेर्पाले जानकारी दिए । उनका अनुसार बाढीले आयोजनामा करिब २ करोड ५० लाख रुपैयाँ बराबरको क्षति पुर्याएको छ ।
बाढीले ङेजिटार हुँदै काव छोर्तेन गुम्बा जाने काठे पुल समेत बगाएको छ । पुल बगाएपछि ङेजिटारमा रहेका तीनवटा चौरी गोठमा आवतजावत गर्न गाह्रो भएको स्थानीयवासीहरूले बताएका छन् । चौरी गोठमा रहेका पशुपालक किसानहरूलाई दैनिक आवश्यक वस्तुहरू पुर्याउने बाटो अवरुद्ध भएको छ । नुप्छे जलविद्युत् आयोजनाको इन्टेकबाट करिब १० किलोमिटर टाढा रहेको छेबुक तालसम्मको क्षेत्र अहिले बाढीले बगाएर ल्याएका ढुंगा र गेग्रानले भरिएको छ ।
