काठमाडौं– नेपाली काँग्रेस रामेछापका युवा नेताहरुले रामेछापमा युवा पुस्ताको नेतृत्वको आवश्यकता र पार्टीभित्र रूपान्तरणको बहस चलाउन थालेको छन् । कांग्रेसको १५ औँ अधिवेशनलाई दृष्टिगत गर्दै युवाहरूले संगठनमा नयाँ सोच, अनुशासन र परिवर्तनको नेतृत्व आवश्यक रहेको धारणा राखेका छन् ।
शनिबार काठमाण्डौको मध्यबानेश्वरस्थित सनराईज फुडल्याण्डमा आयोजित कार्यक्रममा रामेछापका युवा कांग्रेस नेताहरूले पार्टीभित्र अब युवा पुस्ताले जिम्मेवारी लिनुपर्ने आवश्यकता औंल्याएका छन् ।
युवा नेताहरुले अहिलेको राष्ट्रिय राजनीतिक परिस्थिति, कांग्रेसको संगठनात्मक अवस्था र भविष्यको चुनौतीलाई ध्यानमा राख्दै पार्टीले नयाँ पुस्ता प्रति विश्वास देखाउनुपर्नेमा जोड दिए ।
नेपाल तरुण दलका केन्द्रीय सदस्य रमेश खड्काको संयोजकत्वमा सम्पन्न कार्यक्रममा युवाहरूले “पार्टीलाई अहिलेको चुनौती सामना गर्न सक्ने, अनुशासनमा रहि सबैलाई सम्मानपूर्वक व्यवहार गर्न सक्ने, नीति र विधानको बाटोमा हिँड्ने व्यक्तिले मात्र नेतृत्व लिनुपर्छ” भन्ने धारणा राखे ।
कांग्रेसको १५औँ अधिवेशनमा जिल्लामा युवाहरूलाई सभापतिको उम्मेदवार बनाउने तयारीको पनि छलफल चलाउन थालेको नेपाल तरुण दलका केन्द्रीय सदस्य दिपेन्द्र खड्काले बताए । पार्टीभित्र रूपान्तरण र संगठन सुदृढीकरणको काम अगाडि बढाउन सक्ने नेतृत्वको समेत छलफल गर्ने गर्ने र त्यो विषयमा छिट्टै पार्टीका विभिन्न तहका युवाहरूसँग बृहत भेला गरी गहन छलफल गरिने पनि दिपेन्द्र खड्काले बताए । युवाहरुको एजेन्डामा सहमत हुने पार्टीका अन्य साथी हरुलाई पनि बोलाएर बृहत भेला राख्ने र नेतृत्वको विषयमा गहन छलफल गरेर उमेदारी चयन गर्ने पनि खड्काले बताए ।
नेपाल विद्यार्थी संघका केन्द्रीय सदस्य सुशिलहरि बख्रेलका अनुसार, देशको जनसांख्यिक संरचना युवामै केन्द्रित भएकोले नेतृत्व प्रणालीमा पुनःव्यवस्था आवश्यक छ । उनले नयाँ पुस्ता प्रविधि, विश्व सन्दर्भ र व्यवहारिक नेतृत्वका दृष्टिले सक्षम भएकाले कांग्रेसले अब उनीहरूलाई अवसर दिनुपर्ने बताए ।
छलफलमा तरुण दलका केन्द्रीय सदस्यहरू योगेश श्रेष्ठ, विनिती खड्का नेविसंघका केन्द्रीय सदस्यहरु नारायण घिमिरे, विष्णु श्रेष्ठ, विष्णुहरि खड्का, चन्द्र थापा मगर, लोकतान्त्रिक खेलकुद संघ रामेछापका अध्यक्ष पुष्कर पौडेललगायत युवा नेताहरुको सहभागिता रहेको बताईएको छ ।
