रामेछाप – जिल्ला कृषि सहकारी संघको आयोजनामा न्यानो साना किसान कृषि सहकारी संस्था लि.को सह-आयोजनामा तथा साहारा साकोसको समन्वयमा रामेछाप नगरपालिकामा “कृषि उत्पादन, संकलन तथा बजारीकरण” विषयक अभिमुखीकरण कार्यक्रम सम्पन्न भएको छ।
रामेछाप नगरपालिकाको हलमा आयोजित उक्त कार्यक्रममा ५० जनाभन्दा बढी कृषक, कृषि सहकारी संस्थाका प्रतिनिधिहरू तथा सरोकारवालाहरूको सहभागिता रहेको थियो। कार्यक्रममा जिल्ला कृषि सहकारी संघका कोषाध्यक्ष भानुभक्त श्रेष्ठले कृषि उत्पादन वृद्धि, संकलन प्रक्रियामा सुधार, बजारीकरणका अवसर र चुनौतीहरूबारे विस्तृत प्रस्तुति दिएका थिए। त्यस्तै, साहारा साकोसका व्यवस्थापक बलराम लामाले कृषकहरूका लागि सहुलियत ऋण तथा सहकारीका गतिविधिबारे जानकारी गराए।
कार्यक्रमका प्रमुख अतिथि रामेछाप नगरपालिकाका प्रमुख लवश्री न्यौपानेले इमान्दार कृषकहरूलाई उत्पादनमा आधारित अनुदानको व्यवस्था आगामी दिनमा संचालन गर्ने प्रतिबद्धता व्यक्त गरे। विशिष्ट अतिथि प्रमुख प्रशासकीय अधिकृत भोला प्रसाद चापागाईले किसान तथा कृषि सहकारी संस्थाका प्रतिनिधिहरूसँगको समन्वयमा माग आधारित बजेट निर्माण गर्ने प्रतिबद्धता जनाए।
त्यस्तै, वडा नं. ७ सुकाजोरका वडा अध्यक्ष तथा नगर प्रवक्ता समीर कार्कीले कृषकहरूले बीउ पूँजीलाई व्यवस्थित गरी आत्मनिर्भर बन्नुपर्नेमा जोड दिए। नगरपालिकाका पशु शाखा प्रमुख काजी शेर्पाले आधुनिक पशुपालन तथा घरपालुवा जनावरलाई व्यवसायिक रूपमा पालनपोषण गर्ने विषयमा जानकारी गराए।
जिल्ला कृषि सहकारी संघका अध्यक्ष कुमार श्रेष्ठले रामेछापमा उत्पादन हुने गेडागुडी, रैथाने बाली तथा दुग्ध उत्पादनलाई उचित मूल्यमा बिक्री वितरण गर्न सहकारीहरूको भूमिका महत्वपूर्ण हुने बताए।
कार्यक्रमका सहभागीहरूले कृषि उत्पादनलाई प्रवर्द्धन गर्न यस्ता अभिमुखीकरण कार्यक्रम निरन्तर सञ्चालन गर्नुपर्ने सुझाव दिएका छन्। कार्यक्रममा आधुनिक प्रविधिको प्रयोग, उत्पादन वृद्धिका उपाय, संकलन केन्द्रहरूको प्रभावकारी सञ्चालन तथा कृषि उत्पादनको उचित मूल्य निर्धारणबारे व्यापक छलफल गरिएको थियो।
