रामेछाप- रामेछापमा नेपाल डेरी एसोसिएसन गठन भएको छ । जिल्लाका दुग्ध उद्यमीहरूको भेलाले भानुभक्त श्रेष्ठको अध्यक्षतामा जिल्ला समिति गठन भएको हो । श्रेष्ठ चिरञ्जीवी डेरी उद्योगका सञ्चालक हुन् ।
समितिको उपाध्यक्षमा समृद्धि डेरी उद्योगका मनोहर कुमार कार्की, सचिवमा रामेछाप डेरीका किशोर पौडेल, कोषाध्यक्षमा अमृत दुध डेरीका केशरबहादुर खत्री र सदस्यमा गोठपानी डेरी उद्योगका बलराम मगर चयन भएका छन् ।
कम्तीमा ९ सदस्यीय समिति हुने र बाँकी रहेका सदस्यहरूमा मनोनयन गर्दै जाने नव निर्वाचित अध्यक्ष श्रेष्ठले बताए ।
समिति गठनका लागि आयोजित भेलामा बागमती प्रदेश दुग्ध विकास बोर्डका उपाध्यक्ष हरिप्रसाद पौडेल, नेपाल डेरी एसोसिएसनका केन्द्रीय अध्यक्ष प्रल्हाद दाहाल, उपाध्यक्ष दिवप्रसाद धमला, राष्ट्रिय दुग्ध विकास बोर्डका बोर्ड सदस्य रामभक्त दाहाल, नेपाल डेरी एसोसिएसन बागमती प्रदेशका अध्यक्ष टिकाप्रसाद घिमिरे लगायतको सहभागिता रहेको थियो ।
केन्द्रीय अध्यक्ष प्रल्हाद दाहालले नेपाल डेरी एसोसिएसनले देशभर शाखा विस्तार गर्दै दुग्ध क्षेत्रको उन्नति र प्रवर्द्धनमा निरन्तर लाग्ने बताए ।
रामेछाप समितिका नवनिर्वाचित अध्यक्ष भानुभक्त श्रेष्ठले आफू यसअघि नै एसोसिएसनको सदस्य भए पनि जिल्लामा डेरी उद्योगहरूको सीमित संख्या रहेको कारण समिति गठन गर्न नसकिएको बताए । तर, हाल उद्योगहरूको संख्या वृद्धि भएसँगै समिति गठन गर्न सम्भव भएको उनको भनाई रहेको छ ।
आफ्नो प्रतिकृया दिनुहोस्