रामेछाप– अन्तर्राष्ट्रिय महिला (नारी) दिवसको अवसरमा सुनापति गाउँपालिका वडा नं ३ हिलेदेवीमा म्युजिकल चेयर र घैटो फुटाउने खेल प्रतियोगिता भएको छ । ११५ औँ अन्तर्राष्ट्रिय महिला दिवसको दिन शनिवार स्थानीय महिलाहरूको सहभागितामा सुनापति गाउँपालिका वडा नं ३ हिलेदेवीको आयोजनामा प्रतिस्पर्धात्मक प्रतियोगिताको आयोजना भएको हो ।
महिला सम्बन्धी हक अधिकारको जनचेतनासँगै एक अर्का प्रति प्रतिस्पर्धाको भावना विकास गरी हामी पनि जित्न सक्छौ भन्ने सन्देश दिने उद्देश्यका साथ आयोजना गरेको प्रतिस्पर्धात्मक प्रतियोगितामा दर्जनौँ महिलाहरूले भाग लिएका थिए ।
झण्डै दुई दर्जन महिलाहरूले प्रतिस्पर्धा गरेको म्युजिकल चेयर खेलमा कमला श्रेष्ठ प्रथम भएकी छिन् । त्यस्तै ईश्वरी श्रेष्ठ द्वितीय र विष्णु लामा तृतीय भएकी छिन् । प्रतियोगितामा प्रथम हुनेलाई नगद ४ हजारको साथमा प्रमाणपत्र, द्वितीय हुनेलाई ३ हजार नगद सहित प्रमाण पत्र प्रदान गरिएको थियो भने तृतीय हुनेलाई २ हजार नगद पुरस्कार सहित प्रमाणपत्र प्रदान गरिएको थियो ।
त्यस्तै घैँटो फुटाउने खेलमा रुपा श्रेष्ठले घैटो फुटाएपछि उनले पनि पुरस्कार सहित प्रमाण पत्र प्राप्त गरिन्। श्रेष्ठले नगद ३ हजार पुरस्कार प्राप्त गरेकी छिन।
सुनापति गाउँपालिका वडा नं ३ का वडाध्यक्ष कुल बहादुर थिङको अध्यक्षता तथा सुनापति गाउँपालिका उपाध्यक्ष गिता विष्टको प्रमुख आतिथ्ययतामा भएको कार्यक्रममा वडा नं ३ का सयौँ महिलाको सहभागिता रहेको थियो ।
सयौँ महिलाको सहभागिता रहेको कार्यक्रममा बोल्दै उपाध्यक्ष विष्टले महिलाहरूले प्राप्त गरेका हक अधिकारलाई व्यवहारमा लागू गर्दै समाजका विभिन्न क्षेत्रमा नेतृत्व लिन आवश्यक रहेको बताइन् । उनले संविधानले सुनिश्चित गरेका अधिकारहरूलाई महिलाहरू आफैँले सशक्त रूपमा कार्यान्वयन गर्नुपर्नेमा जोड दिँदै, सामाजिक, शैक्षिक, आर्थिक तथा राजनीतिक क्षेत्रमा महिलाको सक्रिय सहभागिता अपरिहार्य रहेको उल्लेख गरिन् ।
उनले सुनापति गाउँपालिकाले महिलाहरूलाई स्वरोजगार बन्न तथा आर्थिक रूपमा सक्षम बनाउने उद्देश्यले सीपमूलक तालिमहरू सञ्चालन गरिरहेको जानकारी दिइन् । महिलाहरूको सशक्तीकरणका लागि पालिकाभर विभिन्न प्रतियोगितात्मक तथा चेतनामूलक कार्यक्रमहरू आयोजना गर्दै आएको उनले बताइन् ।
वडाध्यक्ष कुल बहादुर थिङले पनि वडा भित्रका महिलाहरूको हितलाई ध्यानमा राख्दै उनीहरूको आर्थिक समृद्धिका लागि विभिन्न कार्यक्रमहरू सञ्चालन गर्दै आएको र आगामी दिनमा अझ प्रभावकारी योजनाहरू ल्याइने बताए ।
महिला दिवसको अवसरमा सुनापति गाउँपालिका र वडा कार्यालयहरूले विविध कार्यक्रमहरू सञ्चालन गरेको जानकारी गराइएको छ ।
