रामेछाप- रामेछापको मन्थली नगरपालिका–३ पुरानागाउँस्थित नवनिर्मित शिव पञ्चायन मन्दिर निर्माणमा योगदान पुर्याउने तीन जना व्यक्ति सम्मानित भएका छन् ।
मन्दिरको धार्मिक पूजा–अर्चना तथा प्राण प्रतिष्ठा सम्पन्न भएपछि आयोजित कार्यक्रममा समाजसेवी गुणराज भट्टराई ‘आकाश’, सुरेश सुवेदी र दिनेश सुवेदी सम्मानित भएका । मन्दिर निर्माण तथा धार्मिक गतिविधिमा पुर्याएको योगदानको कदर गर्दै उनीहरूलाई सम्मानपत्रसहित सम्मान गरिएको आयोजकले जनाएको छ ।
बागमती प्रदेश सरकारको करिब ३४ लाख रुपैयाँ लागतमा निर्माण भएको उक्त मन्दिरको उद्घाटन शनिबार मन्थली नगरपालिकाका नगर प्रमुख लव श्रेष्ठले गरेका थिए । बागमती प्रदेश सरकारको संस्कृति तथा पर्यटन मन्त्रालयबाट दुई आर्थिक वर्षमा विनियोजित बजेटमार्फत मन्दिर निर्माण सम्पन्न भएको जनाइएको छ । कार्यक्रममा वक्ताहरूले धार्मिक तथा सांस्कृतिक सम्पदाको संरक्षण र प्रवर्द्धनमा समुदायको सक्रिय सहभागिता आवश्यक रहेको धारणा व्यक्त गरेका थिए ।
