रामेछाप– नेपाल विद्यार्थी संघ मन्थली क्याम्पसले बिहीबार आयोजना गरेको नि:शुल्क स्वास्थ्य परीक्षण शिविरमा ५० जना भन्दा बढी विद्यार्थीले सेवा लिएका छन्। क्याम्पस परिसरमा आयोजना गरिएको शिविरमा क्याम्पसमा अध्ययनरत विद्यार्थीहरुले स्वास्थ्य सेवा लिएका छन् । कार्यक्रमको पहिलो दिन विद्यार्थीहरूको उत्साहजनक उपस्थिति रहनुका साथै उनीहरूले सकारात्मक प्रतिक्रिया जनाएका छन्।
नेविसंघका नेता युवराज बुढाथोकीका अनुसार विद्यार्थीहरू अध्ययनमा मात्र केन्द्रित हुने तर स्वास्थ्यप्रति कम ध्यान दिने प्रवृत्ति भएकाले उनीहरूलाई स्वास्थ्य सचेतना दिलाउने उद्देश्यले कार्यक्रम गरिएको हो।
शिविरमा तामाकोशी अस्पतालका डा. सुमन कर्माचार्यको नेतृत्वमा अन्य स्वास्थ्यकर्मीहरूको टोलीले सेवा प्रदान गरेको थियो। परीक्षणका क्रममा केही विद्यार्थीमा स्वास्थ्य समस्या देखिएको भन्दै चिकित्सकहरूले थप ध्यान दिन सुझाव दिएका छन्। साथै, डा. कर्माचार्यले विद्यार्थीहरूलाई स्वस्थ रहन विभिन्न उपायहरूसमेत सुझाएका छन्। शिविरमा अल्ट्रासाउण्ड लगायतका प्रविधिको प्रयोग गरेर स्वास्थ्य परिक्षण गरिएको आयोजकले बताएको छ ।
नेबिसंघका अनुसार फागुन १८ गते पुनः क्याम्पस परिसरमा स्वास्थ्य परीक्षण कार्यक्रम आयोजना गरिनेछ। पहिलो दिन उपस्थित हुन नसकेका विद्यार्थीहरूले उक्त दिन निःशुल्क परीक्षण गराउन सक्नेछन्।
संघले आगामी दिनहरूमा पनि विद्यार्थीहरूको हितमा विभिन्न कार्यक्रम सञ्चालन गर्ने प्रतिबद्धता जनाएको छ।
