रामेछाप- रामेछापमा तीनलाल स्मृति कपको आयोजना हुने भएको छ । अनेरास्ववियु रामेछापको आयोजनामा रामेछाप स्मृति कप (अन्डर २० खुला पुरुष भलिबल प्रतियोगिता) हुने भएको हो । आयोजक अनेरास्ववियुले सोमबार पत्रकार सम्मेलन गरी फागुन ९ गते देखि १२ गते सम्म प्रतियोगिता संचालन हुने बताएको हो ।
पत्रकार सम्मेलनमा अनेरास्ववियु रामेछापका अध्यक्ष पुष्कर भट्टराइले नेपाल कम्युनिस्ट पार्टीका संस्थापक महासचिव पुष्पलाल श्रेष्ठ, सहिद गङ्गालाल श्रेष्ठ र नेपाली साहित्यका प्रथम सहिद सुब्बा कृष्णलाल अधिकारीको योगदानलाई कदर गर्दै तीनलाल स्मृति कप २०८१ आयोजना गर्न लागिएका बताए ।
आयोजकका अनुसार प्रतियोगितामा विजेता हुने समूहले नगद ५० हजार सहित शिल्ड मेडल र प्रमाण पत्र प्राप्त गर्ने छन् भने द्वितीय हुने समूहले नगद ३० हजार सहित शिल्ड मेडल र प्रमाण पत्र प्राप्त गर्ने छन् । प्रतियोगिताको सेमिफाइनलमा प्रवेश गर्ने दुई समूहले नगद दश÷दश हजारको साथमा प्रमाण प्रदान गरिने आयोजक अनेरास्ववियुका अध्यक्ष भट्टराइले बताए । उत्कृष्ट खेलाडीलाई नगद ३ हजारको साथमा ट्रफि र उत्कृष्ट कोचलाई समेत ट्रफि प्रदान गरिने आयोजकले जनाएको छ ।
प्रतियोगितामा भाग लिनको लागि हाल सम्म २० टिमले आवेदन दिइसकेको आयोजकले बताएको छ । प्रतियोगिता सम्पन्न गर्न करिब पाँच लाख खर्च लाग्ने र उक्त खर्चको लागि मन्थली नगरपालिकाले मुख्य प्रायोजक बन्ने निश्चित भइसकेको पत्रकार सम्मेलनमा जानकारी गराइएको थियो ।
प्रतियोगिताले ग्रामीण क्षेत्रमा लुकेर रहेका खेलाडीको प्रतिभा प्रस्फुटनमा मद्दत पुग्ने र राष्ट्रिय तथा अन्तर्राष्ट्रिय प्रतियोगिताहरूमा भाग लिनलाई थप सहयोग पुग्ने आयोजकको अपेक्षा रहेको आयोजक कमिटीका अध्यक्ष भट्टराइले बताए ।
