रामेछाप- रामेछापको गोकुलगंगा गाउँपालिकामा फोर्स गाडी दुर्घटना हुँदा पाँच जनाको ज्यान गएको छ । शुक्रवार दिउँसो काठमाण्डौबाट बेताली तर्फ जाँदै गरेको ना १ ज ७१२३ नम्बरको फोर्स गाडी गोकुलगंगा गाउँपालिकाको वडा नं ६ फर्पु स्थित सिमलडाँडामा दुर्घटना हुँदा पाँच जनाको ज्यान गएको जिल्ला प्रहरी कार्यालय रामेछापका प्रहरी प्रमुख प्रहरी नायव उपरीक्षक प्रदिप कुमार सिंहले बताए । सिंहका अनुसार दुर्घटनामा परी ज्यान गुमाउनेहरुमा गोकुलगंगा गाउँपालिका वडा नं. ४ बेतालीका वडाध्यक्ष रामचन्द्र बस्नेत, वडा नं ५ की कविता कार्की खड्का, मृतक खड्काकै छोरी स्वस्तिका खड्का र मन्थली नगरपालिका वडा नं. १० चिसापानीका हिरा बहादुर कार्की रहेका छन् । हिरा बहादुर कार्की दुर्घटनामा परेको गाडीको चालक रहेको प्रहरीले जनाएको छ । मृतक एक जनाको भने हाल सम्म पहिचान खुल्न सकेको छैन् ।
त्यस्तै घाइते मध्य दुई जनाको सनाखत भएको छ । सनाखत हुनेहरुमा कास्की जिल्लाको लेखनाथ नगरपालिकाका केशव शर्मा र रामेछापको गोकुलगंगा गाउँपालिका वडा नं ४ बेतालीकी सरस्वती कार्की रहेका छन् । अर्का घाइते एक बालकको नाम थर नखुलेको प्रहरीले बताएको छ ।
गोगुलगंगा गाउँपालिका वडा नं ६ फर्पुका वडाध्यक्ष चन्द्रबहादुर सुनुवारका अनुसार गाडी सडकबाट करिब ३ सय मिटर तल खसेको थियो ।
