रामेछाप- रामेछापको गोकुलगंगा गाउँपालिकामा फोर्स गाडी दुर्घटना हुँदा पाँच जनाको ज्यान गएको छ । शुक्रवार दिउँसो काठमाण्डौबाट बेताली तर्फ जाँदै गरेको ना १ ज ७१२३ नम्बरको फोर्स गाडी गोकुलगंगा गाउँपालिकाको वडा नं ६ फर्पु स्थित सिमखोलामा दुर्घटना हुँदा पाँच जनाको ज्यान गएको जिल्ला प्रहरी कार्यालय रामेछापका प्रहरी प्रमुख प्रहरी नायव उपरीक्षक प्रदिप कुमार सिंहले बताए । उनका अनुसार गाडीमा सवार अन्य तीन जना घाइते भएका छन् ।
दुर्घटनामा परी ज्यानउ गुमाउने मध्ये गोकुलगंगा गाउँपालिका वडा नं ४ का वडाध्यक्ष रामचन्द्र बस्नेत र सवारी चालक प्रकाश कार्कीको पहिचान भएको गोगुलगंगा गाउँपालिका वडा नं ६ फर्पुका वडाध्यक्ष चन्द्रबहादुर सुनुवारले जानकारी दिए । मृतक अन्यको पहिचान हुन बाँकी रहेको अध्यक्ष सुनुवारले बताए । दुर्घटनामा परेको गाडी सडकबाट करिव साढे ३ सय मिटर तल खसेको दुर्घटना स्थलमै रहेको वडाध्यक्ष चन्द्रबहादुर सुनुवारले जानकारी दिए । घाइतेको उद्दार गरी उपचारको लागि मन्थली लगायतका अस्पतालहरुमा पठाइएको उनले बताए ।
