रामेछाप- जुनार जोन संचालन समन्वय समिति रामेछापमा नयाँ नेतृत्व चयन भएको छ । बुधवार रामेछापमा जुनार किसानहरूको भेलाले गुञ्जबहादुर कार्कीको संयोजक्त्वमा नयाँ समिति चयन भएको हो । प्रधानमन्त्री कृषि आधुनिकीकरण परियोजना, परियोजना कार्यान्वयन इकाई रामेछापको सक्रियतामा समिति गठन भएको परियोजना इकाई रामेछापका प्रमुख थिरलाल गैह्रेले बताए । गैह्रेका अनुसार समितिको उपसंयोजकमा पदम बहादुर लामा, सचिवमा कैलाश चौहान, सहसचिवमा चिना कुमारी तामाङ र सदस्यहरूमा क्रमशः ढाल विक्रम कार्की, दीपक कुमार खत्री, तारादेवी गुर्माछाने मगर, सपना तामाङ र प्रेम कुमारी तामाङ चयन भएका छन् ।
परियोजना कार्यान्वयन इकाई रामेछापमा सूचीकृत भएका जुनार कृषि फर्म, संस्था, सहकारी लगायतका संस्थाहरूका करिब ८० जना प्रतिनिधिहरूको उपस्थितिमा समिति चयन भएको गैह्रेले बताए ।
संयोजकमा चयन भएका गुञ्जबहादुर कार्कीले आफ्नो कार्यकालमा रामेछाप जिल्लालाई सबै भन्दा बढी जुनार फल्ने जिल्ला हो भनेर प्रमाणित गर्ने गरी काम गर्ने, किसानका समस्या पहिचान गरी आवश्यक सहयोगका लागि सरोकारवाला निकायहरूसँग समन्वय गर्ने, जुनारको बजारीकरणमा किसानलाई सहयोग गर्ने र बढी जुनार उत्पादनको लागि क्षेत्रफल विस्तार गर्ने जस्ता काम गर्ने प्रतिबद्धता जनाए ।
प्रधानमन्त्री कृषि आधुनिकीकरण परियोजना, परियोजना कार्यान्वयन इकाई रामेछापले रामेछापको बढी जुनार उत्पादन हुने क्षेत्रलाई जुनार जोन क्षेत्र घोषणा गरेर अमिलो जातको फलफूल उत्पादनमा वृद्धि गर्दै बजारीकरण किसानहरूलाई सहयोग गर्दै आएको छ ।
यस अघि जुनार जोन संचालन समन्वय समितिको संयोजकमा युगराज पाख्रिन रहेका थिए ।
