रामेछाप– रामेछापको मन्थली नगरपालिका वडा नं ५ सुनारपानीमा बोलेरो जीप दुर्घटना हुँदा एक जनाको ज्यान गएको छ भने जीपमा सवार पाँच जना घाइते भएका छन् । आइतबार दिउँसाे सदरमुकाम मन्थलीबाट मन्थली नगरपालिकाको वडा नं ४ सालु तर्फ जाँदै गरेको बा १८ च १८३९ नम्बरको बोलेरो जीप सुनारपानीमा दुर्घटना हुँदा मन्थली नगरपालिका वडा नं ४ को वडा सदस्य समेत रहेकी पदम माया नेपालीको ज्यान गएको छ ।
त्यस्तै जीपमा सवार ५ जना घाइते हुनेहरूमा मन्थली नगरपालिका वडा नं. ४ को वर्ष ३४ की सिता नेपाली, वर्ष २५ की सुजिता रसाइली, वर्ष ६९ को दिलिप कुमार वरुवाल, वर्ष ४२ को गुन कुमार थापामगर र वर्ष २५ की सरिता नेपाली रहेका छन् । त्यस्तै जीपमा सवार घाइते सरिता नेपालीको ५ महिना की छोरी रोनिसा नेपाली भने सकुशल रहेको प्रहरीले जनाएको छ ।
जिल्ला प्रहरी कार्यालय रामेछापका प्रवक्ता कौशल न्यौपानेका अनुसार पदम माया नेपालीको घटना स्थलमै मृत्यु भएको छ । चालक सहित ७ जना सवार रहेको बोलेरो जीप गुडी रहेको अवस्थामा आफै अनियन्त्रित भई सडकबाट करिब १ सय ५० मिटर तल पाखामा खसेको प्रवक्ता न्यौपानेले बताए ।
घाइते मध्ये गम्भीर अवस्थामा रहेका दिलिप कुमार बरुवाल र गुन कुमार थापामगरलाई रामेछाप सामुदायिक अस्पतालमा सामान्य उपचार पश्चात् थप उपचारको लागि काठमाण्डौँ पठाइएको मन्थली नगरपालिका वडा नं ४ सालुका वडाध्यक्ष राजन घिमिरेले जानकारी दिए । अन्य घाइतेको मन्थलीकै स्वास्थ्य संस्थामा उपचार भइरहेको वडाध्यक्ष घिमिरेले बताए ।
