रामेछाप– नेपाली काँग्रेसका केन्द्रीय सदस्य डा. शशांक कोइरालाले राजनीतिक आफ्नो कन्ट्रोलमा नहुने बताएका छन् । आइतबार सहिद गंगाल फाउण्डेशनद्वारा रामेछापमा आयोजित मुटु रोग स्वास्थ्य शिविरमा आफ्नो भनाई राख्दै काँग्रेस केन्द्रीय सदस्य डा. कोइरालाले राजनीति कहिल्यै पनि आफ्नो हातको कन्ट्रोलमा नहुने बताएका हुन् । राजनीति गर्ने मानिसले सोचेको एउटा भए पनि अर्को भइदिने गरेको उनको भनाई रहेको छ ।
डा. कोइरालाले अहिलेको राजनीतिलाई इंकित गर्दै भने– ‘राजनीति कहिल्यै पनि आफ्नो कन्ट्रोलमा नहुने रहेछ । एउटा सोच्यो, भइदिन्छ अर्कै । तर रमाइलो चाहिँ रमाइलो हुँदो रहेछ, त्यही उथलपुथलमा रमाउन सक्नु प¥यो ।’
डा. कोइरालाले मानव जीवनमा कुनै पेशा सर्वश्रेष्ठ छ भने त्यो पेशा चिकित्सकीय पेशा रहेको बताउँदै चिकित्सकीय पेशा जस्तै अरू क्षेत्रलाई पनि त्यस्तै बनाउन आवश्यक रहेको बताए । आफू चिकित्सकीय पेशामा हुँदाको समयलाई स्मरण गर्दै डा. कोइरालाले एउटा चिकित्सकले एउटा बिरामीलाई निको पार्दा पाइने खुसी भन्दा अरू कुनै खुसी नहुने बताउँदै विभिन्न शिविरमा हिँड्ने स्वास्थ्यकर्मीलाई आफू खुसी हुने गरी काम गर्न सुझाव दिए ।
नेपाली काँग्रेसको पूर्व महामन्त्री समेत रहेको डा. कोइरालाले २०८२ सालमा हुने १५ औँ महाधिवेशनबाट आफू सभापति हुने र फरक ढङ्गबाट पार्टी चलाउने भनाई पनि राखेका छन् । उनले पार्टी सञ्चालन शैलीमा परिवर्तनको आवश्यकता रहेको बताए । ‘म पार्टी नेतृत्वका लागि अगाडि बढ्छु, सभापति बनेर अहिलेभन्दा भिन्न ढङ्गले पार्टी चलाउने मेरो योजना छ,’ कोइरालाले भने ।
