रामेछाप– फागुन २१ गते हुने प्रतिनिधि सभा सदस्यको निर्वाचनको लागि उम्मेदवारी दर्ता गर्न एक दिन बाँकी हुँदा समेत नेपाली काँग्रेस रामेछापको उम्मेदवारको टुंगो लागेको छैन । त्यसो त संसदीय बोर्ड मार्फत टिकट वितरणको काम गरिरहेको नेपाली काँग्रेसले हाल सम्म देशैभरका कुनै पनि निर्वाचन क्षेत्रको उम्मेदवार टुङ्ग्याएको छैन । विशेष महाधिवेशनबाट पार्टीको केन्द्रीय नेतृत्व फेरिएसँगै आन्तरिक विवादका कारण हाल सम्म टिकटको टुंगो लाग्न नसकेको बुझाइ रहेको छ । यद्यपि टिकट वितरणको लागि भने रामेछाप सहित १६५ ओटै निर्वाचन क्षेत्रको छलफल भइरहेको नेपाली काँग्रेस रामेछापका एक नेताले बताए ।
रामेछापमा पाँच नेताको नाममा छलफल
प्रतिनिधि सभाका लागि एक मात्र निर्वाचन क्षत्र रहेको रामेछापको लागि नेपाली काँग्रेसको तर्फबाट उम्मेदवार बन्नको लागि यस अघि जिल्ला कार्यसमिति मार्फत प्रतिनिधि तर्फ प्रत्यक्ष, समानुपातिक र राष्ट्रिय सभा सदस्यका लागि सिफारिसमा परेका पाँच नेताहरूको नाममा छलफल भइरहेको नेपाली काँग्रेस रामेछापका एक नेताले जानकारी दिए । उनले भने,“उम्मेदवारी दर्ता गर्ने समय माघ ६ सम्म छ अर्थात् अब एक दिन मात्रै बाँकी रहेको छ । तर, रामेछाप जिल्लाको लागि हाम्रो पार्टीबाट टिकटको टुंगो लाग्न सकेको छैन । अहिले यस अघि जिल्लाबाट प्रत्यक्ष, समानुपातिक र राष्ट्रिय सभाको लागि सिफारिसमा परेका नेताहरूको नाममा छलफल भइरहेको छ । छलफलमा रहेका पाँच नेता मध्ये एक जनाले टिकट फिक्स हुन्छ होला ।” उनका अनुसार टिकटको लागि छलफलमा रहेका नामहरूमा पूर्णबहादुर तामाङ कान्छाराम, रामचन्द्र खड्का, युवराज भट्टराई, डा. सुमन कर्माचार्य र गेल्जे शेर्पा रहेका छन् ।
छलफलमा रहेका पाँच नेताको राजनीतिक पृष्ठभूमि
छलफलमा रहेका पाँच नेताहरूमा पूर्णबहादुर तामाङ कान्छाराम नेपाली काँग्रेस रामेछापको वर्तमान सभापति एवं विघटित प्रतिनिधि सभा सदस्य हुन् । काँग्रेस र एमालेको गठबन्धनमा बनेको केपी ओली नेतृत्वको सरकारमा ऊर्जा, जलश्रोत तथा सिँचाई राज्यमन्त्री समेत भएर काम गरेको अनुभव तामाङसँग रहेको छ । तामाङ पार्टी राजनीतिसँगै जिल्लाको समाजसेवामा समेत सक्रिय छन् ।
त्यस्तै रामचन्द्र खड्का डेढ दशक भन्दा बढी नेपाली काँग्रेस रामेछापको पार्टी सभापति भएर रामेछाप काँग्रेस हाँकेका नेता हुन् । खड्का हाल नेपाली काँग्रेसको महाधिवेशन प्रतिनिधि समेत छन् । खड्कालाई रामेछाप काँग्रेसमा एक अभिभावको रूपमा समेत कार्यकर्ताले उभ्याउने गरेका छन् ।
बहुदलीय व्यवस्थाको लागि २०४६ सालको जनआन्दोलन ताका जेलको यातना समेत भोगेका युवराज भट्टराई पटक–पटक नेपाली काँग्रेसको महाधिवेशन प्रतिनिधि भइसकेका छन् । उनी वर्तमान महाधिवेशन प्रतिनिधि समेत हुन् । नेता भट्टराईलाई काँग्रेसको बौद्धिक नेताको रूपमा समेत परिचित छन् ।
२०३५ सालमा नेविसंघबाट काँग्रेसको राजनीतिमा प्रवेश गरेका नेता डा. सुमन कर्माचार्य नेपाली काँग्रेसको गाउँ, क्षेत्र, जिल्ला र केन्द्रको विभिन्न जिम्मेवारीमा बसेर काम गरिसकेका नेता हुन् । कर्माचार्यले २०६७ सालमा रामेछाप काँग्रेसको क्रियाशील सदस्यता वितरण समितिको संयोजक बनेर १२ औँ जिल्ला अधिवेशन सम्पन्न गराएका थिए । काँग्रेस महासमिति सदस्य समेत भइसकेका कर्माचार्य २०५१ सालको मध्यावधि निर्वाचनको प्रचार प्रसारको लागि तयार पारिएको गीति क्यासेट बनाउने ताका हालका काँग्रेस उपसभापति विश्वप्रकाश शर्माका सारथि हुन् । डा. कर्माचार्य हाल ग्रामीण नागरिकको स्वास्थ्य सुधारका अभियन्ताको रूपमा काम गरिरहेका छन् ।
दशकौँ वर्ष अगाडिदेखि काँग्रेसमा संलग्न गेल्जे शेर्पा २०४६ सालको जनआन्दोलनदेखि नै काँग्रेसमा बढी क्रियाशील छन् । उनी विभिन्न समयमा नेपाली काँग्रेसको महाधिवेशन प्रतिनिधि भइसकेका नेता हुन् ।
