रामेछाप– रामेछापको सुनापति गाउँपालिका वडा नं ४ बेथानमा रहेको कुशेश्वर माविको स्काउट ट्रुपलाई व्यक्तिगत सहयोगमा स्काउट पोसाक वितरण भएको छ । नेपाली काँग्रेस रामेछापका जिल्ला कार्य समिति सदस्य एवं युवा नेता दिपेन्द्र खड्का, काँग्रेस नेतृ सरस्वती रायमाझी, समाजसेवी सुन्दर चालिसे र विष्णु केसीको आर्थिक सहयोगमा कुशेश्वर स्काउट ट्रुपका २५ जनालाई स्काउट पोसाक वितरण गरिएको हो ।
बुधवार विद्यालयमा एक कार्यक्रमको आयोजना गरी स्काउट विद्यार्थीलाई पोसाक वितरण गरिएको हो । विद्यालयका पूर्व विद्यार्थी समेत रहेका व्यक्तिहरूले स्काउट पोसाक उपलब्ध गराएर विद्यालयलाई ठुलो सहयोग पुगेको विद्यालयले बताएको छ ।
स्काउट पोसाक वितरण कार्यक्रममा बोल्दै स्थानीय समेत रहेका दिपेन्द्र खड्काले आफूले पढेको विद्यालयका स्काउटका विद्यार्थी लगायतलाई सहयोग गर्न पाउँदा आफू निकै खुरी भएको बताए । उनले विद्यालयको लागि अन्य सहयोग आवश्यक परेमा सहयोग गर्ने प्रतिबद्धता समेत जनाएका छन् । त्यस्तै कार्यक्रममा समाजसेवी एवं पोसाक खरिदको लागि आर्थिक सहयोग गर्ने विष्णु केसी र सरस्वती रायमाझी लगायतले आफ्नो भनाइ राखेका थिए ।
