रामेछाप- उमाकुण्ड गाउँपालिकाको १५औँ गाउँ सभा सम्पन्न भएको छ । गाउँपालिको आर्थिक ऐन २०८० लाई संशोधन सहित विभिन्न महत्त्वपूर्ण विषयमा छलफल गर्दै १५ औँ गाउँ सभा आइतबार सम्पन्न भएको हो ।
गाउँ सभाका सदस्यहरूले चालु आर्थिक वर्षका लागि विनियोजित योजनाहरूको हाल सम्मको अवस्था कस्तो रहेको र चाँडो कार्यान्वयनमा लैजानु पर्नेमा जोड दिँदै गाउँ सभाका अध्यक्ष मार्फत सभाको ध्यानाकर्षण गराएका थिए । सभाका सदस्यहरूले कार्यसूचीमा रहेका विषय बाहेक कृषि, पशुपालन, शिक्षा लगायतका विषयमा पनि आफ्नो धारणा राख्दै सभाका अध्यक्ष सामु सार्वजनिक महत्वका विभिन्न विषयमा प्रश्न समेत राखेका थिए । सभाका सदस्यहरूले उठका विभिन्न प्रश्नमा सभाध्यक्ष एवं गाउँपालिकाका अध्यक्ष शेरबहादुर सुनुवार, गाउँपालिका उपाध्यक्ष सावित्री सुनुवार र गाउँपालिका प्रवक्ता रुद्र मणि नेवारले सदस्यहरूले उठाएका धेरै जसो विषमा सदस्य समेत जिम्मेवार हुनु पर्ने र सदस्यहरूले उठाएका विषयवस्तुमा आफूहरू सचेत रहेको भनाई राखेका थिए ।
गाउँपालिका अध्यक्ष एवं गाउँ सभा अध्यक्ष शेर बहादुर सुनुवारले गाउँपालिकाका गौरवका योजनाहरू निरन्तर रूपमा अगाडि बढिरहेको र ती योजनालाई चाँडो भन्दा चाँडो कार्यान्वयन गराउन गाउँ कार्यपालिकाको सिंगो टिम लाग्नु पर्ने बताए । त्यस्तै उपाध्यक्ष सावित्री सुनुवारले चालु आर्थिक वर्षको अर्धवार्षिक सम्ममा भएका मुख्य–मुख्य उपलब्धिहरूलाई प्रस्तुत गर्दै गाउँ सभाबाट पारित भएका नीतिगत कुरालाई सबैले पालना गरेर अगाडि बढ्नु पर्नेमा जोड दिइन् ।
गाउँ सभाको कार्यसूचीमा ६ ओटा एजेन्डाहरू रहेको र सबै एजेन्डामा वृहत् छलफल गरेर सर्वसम्मत रूपमा पारित गरिएको गाउँपालिकाका प्रमुख प्रशासकीय अधिकृत रामचन्द्र लामाले जानकारी दिए ।
