रामेछाप- रामेछाप नगरपालिकाले जिल्ला स्तरीय राष्ट्रपति रनिङ शिल्ड प्रतियोगिताको उपाधि जितेमा एक लाख पुरस्कार दिने घोषणा गरेको छ । छैटौँ रामेछाप नगरपालिका स्तरीय राष्ट्रपति रनिङ शिल्ड प्रतियोगिताको समापन कार्यक्रममा बोल्दै नगर प्रमुख लवश्री न्यौपानेले पौष २१ गतेबाट हुने जिल्ला स्तरीय राष्ट्रपति रनिङ शिल्ड प्रतियोगिताको उपाधि रामेछाप नगरपालिकाले जितेमा एक लाख पुरस्कार दिने घोषणा गरेका हुन् ।
नगर प्रमुख न्यौपानेले भने–‘तीन दिन अघि देखि सुरु भएको नगर स्तरीय राष्ट्रपति रनिङ शिल्डमा खेलाडीहरूको उत्साह देख्दा हामी पनि उत्सहाति भएका छौँ । नगरपालिकाले उहाँहरूको खेल उत्साहलाई सम्मान गर्दै जिल्ला स्तरीय राष्ट्रपति रनिङ शिल्ड प्रतियोगितामा राम्रो नतिजा निकाल्न अनुरोध गर्दछौँ । यदि जिल्ला स्तरीय राष्ट्रपति रनिङ शिल्ड प्रतियोगिताको उपाधि जितेमा नगरपालिकाले एक लाख पुरस्कार दिने छ, यो पनि हामी घोषणा गर्दछौँ । त्यति मात्रै हैन, नगरपालिकाबाट जिल्ला स्तरीय प्रतियोगितामा भाग लिएर स्वर्ण पदक जितेर आउने खेलाडीलाई पनि पाँच÷पाँच हजारका दरले पुरस्कृत गर्ने छौँ । त्यस्तै समूहगत खेलमा प्रथम भएर आउने समूहलाई २० देखि २१ हजार रुपैयाँ दिने छौ भने दौड तर्फको ४ इन्टु एक सय र ४ इन्टु चार सय मिटर रिलेमा प्रथम हुनुभयो भने ८ हजारका दरले पुरस्कार दिने छौँ । तर, त्यसको लागि खेलमा पहिलो चाहिँ हुनु प¥यो ।’
जिल्ला स्तरीय राष्ट्रपति रनिङ शिल्ड प्रतियोगितामा नगरपालिकाबाट खेल खेल्न जाने खेलाडीलाई आइतबार देखि नै ‘क्लोज क्याम्पमा’ राखेर प्रशिक्षण गराइने नगर प्रमुख न्यौपानेले उद्घोष गरेका छन् । जिल्ला स्तरीय प्रतियोगिता संचालन हुने समय सम्मका लागि छनौट भएका खेलाडीलाई बस्न, खाना र अन्य सुविधा समेत नगरपालिकाले नै उपलब्ध गराउने नगरको योजना रहेको उनले बताए ।
उता रामेछाप नगरपालिकामा सुविधा सम्पन्न खेल मैदान नहुँदा खेलाडीलाई राम्रोसँग खेल प्रशिक्षण तथा ठुला आयोजना गर्न समस्या भएको बताउँदै नगर प्रमुख न्यौपानेले निर्माणाधीन अवस्थामा रहेको सुकाजोर कभड हललाई छिटो निर्माण सम्पन्न गरेर संचालनमा ल्याउने व्यवस्था मिलाइदिन प्रतिनिधि सभा सदस्य पूर्णबहादुर तामाङ कान्छाराम मार्फत प्रदेश सरकार र केन्द्रीय सरकारलाई अनुरोध गरेका छन् । त्यस्तै रामेछापको वडा नं ६ ओख्रनीमा पनि संघीय सरकार र प्रदेश सरकारको बजेटबाट खेल मैदान बनाएर खेल क्षेत्रको विकासलाई अगाडि बढाउन सरकारसँग माग गरेका छन् ।
