रामेछाप- नेकपा एमालेले मङ्सिर १४ गतेबाट पार्टी अध्यक्ष केपी शर्मा ओलीको नेतृत्वमा सुरु गरेको समृद्धिको लागि संकल्प यात्रा सोमबार रामेछाप आइपुग्ने भएको छ । बैतडीको झुलाघाटबाट सुरु भई पाँचथरको चिवाभञ्ज्याङमा पुगेर समाप्त हुने समृद्धिको लागि संकल्प यात्रा सोमबार रामेछाप आइपुग्ने भएको हो । नेपाल कम्युनिस्ट पार्टीका महासचिव पुष्पलालको जन्मथलो समेत रहेको रामेछापमा वर्तमान पार्टी अध्यक्ष केपी शर्मा ओली सहितको टोली रामेछाप आउने भएपछि नेकपा एमाले रामेछापले कार्यक्रमलाई सफल बनाउन भव्य तयारी गरेको छ ।
सोमबार बिहान धुलिखेलबाट सुरु हुने यात्रा सिन्धुपाल्चोक, दोलखा हुँदै अपराह्न रामेछापको सदरमुकाम मन्थली आइपुग्ने नेकपा एमाले रामेछापले बताएको छ ।
टोली सोमबार साँझ रामेछाप आइपुगेपछि मन्थलीको तीनलाल पार्कमा सन्देश सभा राखिएको नेकपा एमाले रामेछापका अध्यक्ष आनन्द कुमार श्रेष्ठले बताए । श्रेष्ठका अनुसार सन्देश सभासँगै विभिन्न सांस्कृतिक कार्यक्रम हुने छ भने मंगलबार बिहान अन्तरक्रिया कार्यक्रम राखिएको छ । मन्थलीको अन्तरक्रिया सकेर मंगलबार बिहान बिपी कोइराला र मदन–आश्रितको सालिकमा माल्यार्पन गरेर टोली सिन्धुलीको खुर्कोट हुँदै घुर्मी प्रस्थान गर्ने कार्यक्रम रहेको अध्यक्ष श्रेष्ठले बताए ।
बैतडीको झुलाघाटबाट यात्रा सुरु गरेको एमालेले समृद्धिको यात्रा पनि त्यहीबाट सुरु भएको समृद्धिको यात्रामा रहेको एमालेले दाबी गरेको छ । देशको अधिकांश भूभाग ओगटेको मध्य पहाडी क्षेत्र रहेको र यसको सुरुवाती बिन्दु झुलाघाट नै रहेकाले यसले थुप्रै सम्भावनालाई पहिल्याउने एमालेको दाबी छ । जलस्रोतको भण्डार, जैविक विविधताको खानी र बढी जनसङ्ख्या बसोबास रहेको मध्य पहाडी क्षेत्र नै भएकाले समृद्धिको आधार नै मध्य पहाडी क्षेत्रमा रहेको सङ्केत गर्ने एमालेले आयोजना गरेका विभिन्न कार्यक्रममा अध्यक्ष केपी ओलीले बताउँदै आएका छन् ।
मङ्सिर १४ गतेदेखि सुरु भएको यात्रा पुस १ गते पाँचथरको चिवाभञ्ज्याङ पुगेर अन्त्य हुने कार्यक्रम रहेको छ ।
