रामेछाप– नेकपा एमालेको प्रदेश अधिवेशनको लागि प्रतिनिधि छनौटमा मनोमानी भएको भन्दै नेपाल खेलकुद महासंघ रामेछापका जिल्ला अध्यक्षले पदबाट राजीनामा दिएका छन् । असोज ८ र ९ गते हुने बागमती प्रदेश अधिवेशनको लागि पालिकाबाट प्रतिनिधि छनौटमा निर्वाचन प्रक्रिया समेत नगराई सीमित व्यक्तिको मनोमानीबाट प्रतिनिधि छनौट भएको भन्दै जिल्ला अध्यक्ष तेजराज घिसिङले पदबाट राजीनामा दिएका हुन् ।
आइतबार (आफ्नो फेसबुक एकाउन्टबाट) एक प्रेस विज्ञप्ति जारी गर्दै अध्यक्ष घिसिङले प्रतिनिधि छनौटमा असन्तुष्टि जनाउँदै राजीनामा गरेका हुन् । विज्ञप्तिमा घिसिङले लेखेका छन् –‘नेपाल खेलकुद महासंघ रामेछाप जिल्लाको दोस्रो अधिवेशन मिति २०७९/११/२५ गते मलाई सर्वसम्मत जिल्ला कमिटीको अध्यक्ष बनाई उक्त पदमा बसी कार्यभार समाल्दै आयको र हाल नेकपा एमाले प्रथम वाग्मती प्रदेश अधिवेशन को लागी यहीँ मिति २०८०/०५/२५ गते सम्बन्धित पालिका बाट प्रतिनिधि चयन गर्ने क्रममा मेरो पनि उम्मेदवारी रहेकोले खाँडादेवी पालिका निर्वाचन कमिटी लाई म स्वयंले मनोनयन दरखास्त दर्ता गरेको तर निर्वाचन प्रक्रिया समेत नगराई सीमित व्यक्तिको मनोमानी ढङ्गबाट म स्वयं लाई पनि सरसल्लाह र जानकारी समेत नगरी विधी प्रक्रिया नै मिचेर अलोकतान्त्रिक प्रक्रिया बाट प्रदेश प्रतिनिधि चयन गरिएको हुँदा नेकपा एमाले पार्टी विधि र विधान मा चल्नु पर्छ भन्ने मेरो मान्यता रहेकोले नेपाल खेलकुद महासंघ रामेछापको अध्यक्ष पदबाट राजीनामा दिएको जानकारी गर्दछु ।’
राजिनामाको विषयमा हाम्रो प्रहार डटकमसँग कुरा गर्दै अध्यक्षले भने–‘खाँडादेवी गाउँपालिकामा १६ सय ४४ जना सङ्गठित सदस्य हुनुहुँदो रहेछ । त्यो आधारमा यो पालिकाबाट १३ जना प्रतिनिधि छनौट हुन पाउने भएकाले मैले पनि पार्टीको विधान अनुसार दरखास्त दिएँ । तर, दरखास्तको विषयमा कुनै पनि छलफल नगरी प्रतिनिधि छनौट भयो । यसरी पार्टीलाई कुनै पाइदा नहुने देखेपछि मैले राजीनामा दिएको हुँ । यस्तो कार्यले पार्टीलाई कुनै फाइदा गर्दैन । पार्टीका नेताहरूले यस्ता सीमित व्यक्तिको मनोमानीलाई रोक्न पहल गर्नु पर्छ ।’
घिसिङ गएको स्थानीय तहको निर्वाचन बेला नेपाली काँग्रेस खाँडादेवी गाउँपालिकाको सभापति त्याग गरी नेकपा एमालेमा प्रवेश गरेका थिए ।
