रामेछाप- रामेछाप उद्योग वाणिज्य संघको अध्यक्षमा उम्मेद्वारी दिएका केशव घिमिरेले आफ्नो उम्मेद्वारी फिर्ता लिएका छन् । रामेछाप उद्योग वाणिज्य संघको बर्तमान अध्यक्ष समेत रहेका घिमिरेले आइतबार आफ्नो उम्मेद्वारी फिर्ता लिँदै नविन कुमार थापामगरको समूहलाई समर्थन गर्ने उद्घोष गरेका छन् ।
उम्मेद्वारी फिर्ता पछि पत्रकार सम्मेलनमा उम्मेद्वारी फिर्ता लिनुको कारण बताउँदै घिमिरेले भने– ‘रामेछाप उद्योग वाणिज्य संघमा आवद्ध भएका उद्योगी तथा व्यवसायीहरुलाई एकताबद्ध बनाउने गरी सहमतीमा नेतृत्व चयन गर्ने प्रयोजनको लागि आफूले उम्मेद्वारी दिएको तर, त्यो संभव नभएपछि उम्मेद्वारी फिर्ता लिएको छु । मैले दुबै समूहका उम्मेद्वारहरुलाई मिलेर जना अनुरोध गरे तर, उहाँहरुको बीचमा सहमती हुने कुनै संभावना नदेखेपछि मैले आजै आफ्नो उम्मेद्वारी फिर्ता लिएको हुँ । कसैको दबाब वा प्रभावमा नभइ आफ्नै विवेकले उम्मेद्वारी फिर्ता लिएको हुँ ।’
घिमिरेले आफू अध्यक्ष हुने बेला एउटा समूहले सघएको बताउँदै अहिले त्यो समूह नविन कुमार थापासँग रहेकाले उक्त समूहलाई सघाउने पनि प्रतिवद्धता जनाएका छन् ।
घिमिरेले आफ्नो उम्मेद्वारी फिर्ता लिएपछि फागुन २७ गते हुने निर्वाचनमा नविन कुमार थापामगर र नवराज ढुंगेल बीच मात्रै प्रतिस्पर्धा हुने भएको छ । थापामगर रामेछाप उद्योग वाणिज्य संघको वर्तमान वरिष्ठ उपाध्यक्ष हुने भने ढुंगेल वर्तमान महासचिव हुन् ।
