रामेछाप– नेपाल बार एशोसिएशन इकाई रामेछापले ५ जना संस्थापक सदस्यहरुलाई सम्मान गरेको छ । नेपाल बार एसोसिएशनको ६६ औँ स्थापना दिवसको अवसर पारेर विहिबार रामेछाप बार इकाईले आफ्ना संस्थापक सदस्यहरुलाई सम्मान गरेको हो । सम्मानित हुनेहरुमा शिव कुमार कार्की, रामचन्द्र वियोगी, पुस्करराज प्रसाईँ, चेत प्रसाद पौडेल र आङबाबु लामा रहेका छन् ।
उनिहरुलाई रामेछापका जिल्ला न्यायधिश इन्दिरा शर्माले सम्मान पत्र प्रदान गर्दै सम्मान गरेकी हुन् । कार्यक्रममा बोल्दै जिल्ला न्यायधिश शर्माले प्रभावकारी न्याय सम्पादनमा नेपाल बार एशोसिएशनको भूमिका महत्वपूर्ण रहेको उल्लेख गरिन् । बार र बेन्च बीचको सकरात्माक सम्बन्धले न्याय प्रणालीमा राम्रो हुने उनको भनाइ रहेको थियो ।
त्यस्तै सम्मानित भएका नेपाल बार एशोसिएशन इकाई रामेछाप संस्थापक सदस्य शिव कुमार कार्कीले संस्थाको सम्मानले आगामी दिनमा आफ्ना अग्रजहरु प्रति सम्मान राख्नु पर्छ भन्ने कुरा स्थापित भएको बताए । इतिहाँस प्रतिको सम्मानले वर्तमानमा हिड्ने बाटो तय गर्ने उनलको भनाइ रहेको छ । कार्यक्रममा बोल्ने बक्ताहरुले नेपालमा लोकतान्त्रिक गणतन्त्रको स्थापना, संविधान कार्यन्वयन र मानव अधिकारको रक्षाका लागि बार एशोसिएशनले खेलेका भूमिका उल्लेख्य रहेको चर्चा गरेका थिए ।
नेपाल बार एशोसिएशन इकाई रामेछापका अध्यक्ष विचारसिं दोङको अध्यक्षमा भएको कार्यक्रममा जिल्ला न्यायधिवक्ता योगेन्द्र प्रसाद ढुंगेल, रामेछाप जिल्ला अदालतका श्रेस्तेदार रामप्रसाद पौडेल र नेपाल पत्रकार महासंघ रामेछापका उपाध्यक्ष कैलाश खत्रीले नेपाल बार एशोसिएशनको ६६ औँ स्थापना दिवसको अवसरमा शुभकामना मन्तव्य राखेका थिए ।
