रामेछाप- रामेछाप नगरपालिकाको वडा नं ५ रामपुरमा विहेको भोज खाएका ३४ जना विरामी भएका छन् । आइतबार रामपुर साईटारका प्रदिप मगरको बिहेको भोज खाएकाहरुलाई सोमबार बेलुकादेखि तारन्तार झाडा वान्ता हुने र पेट दुख्ने समस्या देखिएको छ । जिल्ला अस्पताल रामेछापका अनुसार विरामी परेका मध्ये १४ जनालाई रामेछाप जिल्ला अस्पतालमा उपचारका लागि भर्ना गरिएको छ । अरु २० जना शहरी स्वास्थ्य केन्द्र रामपुरमा उपचार भइरहेको छ ।
जिल्ला अस्पतालमा पुगेका विरामीको उपचारमा सम्लग्न स्वास्थ्यकर्मी उदय घिसिङका अनुसार सवै विरामीमा ईहिस्टोलाईटिका नामको किटाणु फेला परेको छ । उक्त किटाणुले आउं र पखाला गराउने उनले वताए । पेट दुख्ने र तत्कालै आउं सहितको पखाला लाग्ने समस्या देखिएका विरामीहरुलाई जिल्ला अस्पतालमा उपचार थालिए पछि क्रमिक सुधार हुदै गएको उनले वताए ।
आईतबार विवाहको लागि काटिएको बंगुरको मासु भोजमा जानेलाई खुवाइएको थियो । बासि मासु खाएका अधिकांश विरामी परेको हुन सक्ने चिकित्सकहरुले बताएका छन् ।
यसैविच विवाह भोज खाएर विरामी परेका विरामीको घर दैलोमानै पुगेर उपचार गर्ने उद्धेश्यले जिल्ला अस्पताल रामेछापका चिकित्सक डा. मनोज यादवको नेतृत्वमा औषधि सहितको स्वास्थ्यकर्मीको टोली मंगलबार अपरान्ह त्यस तर्फ लागेको छ । यादवले गाउंमा पुगेपछि थप विरामीहरुमा देखा परेका समस्याको बारेमा विस्तृत अनुसन्धान गर्ने जनाएका छन् ।
आफ्नो प्रतिकृया दिनुहोस्