रामेछाप- रामेछापमा प्रतिनिधि सभा र प्रदेशमा समानुपातिक तर्फको मतमा नेकपा एमाले पहिलो भएको छ । नेकपा एमालेले रामेछापबाट प्रतिनिधि सभा तर्फको समानुपातिकमा २८ हजार १ सय ५० मत प्राप्त गरेको छ भने प्रदेश सभा तर्फ समानुपातिकमा २८ हजार ५ सय ४ मत पाएको छ । दोस्रो स्थानमा रहेको नेपाली काँग्रेसले प्रतिनिधि सभा तर्फ २४ हजार १ सय १ मत पाएको छ भने प्रदेश सभा तर्फ २५ हजार ७ सय ५ मत पाएको छ ।
त्यस्तै नेकपा माओवादी केन्द्रले प्रतिनिधि सभा तर्फ २१ हजार ५४ मत ल्याएर रामेछापमा तेस्रो भएको छ । माओवादी केन्द्रले प्रदेश सभामा १८ हजार ६ सय ८५ मत ल्याएको छ ।
केही समय अघि मात्रै स्थापना भएको राष्ट्रिय स्वतन्त्र पार्टीले ४ हजार ६ सय २३ मत ल्याएर चौथो धेरै मत ल्याउने पार्टी बनेको छ । राष्ट्रिय स्वतन्त्र पार्टीले प्रदेश सभा सदस्यको निर्वाचनमा अहिले भाग नलिने निर्णय गरेकाले प्रदेश सभामा कुनै पनि मत पाएको छैन् ।
राष्ट्रिय प्रजतन्त्र पार्टीले प्रतिनिधि सभा तर्फ समानुपातिकमा दुई हजार ७ सय १ मत पाएको छ भने प्रदेश सभा तर्फ ३ हजार ६ सय ८६ मत पाएको छ । एमालेबाट फुटेर बनेको नेकपा एसले रामेछापमा प्रतिनिधि सभा तर्फ १ हजार ३ सय ४८ मत पाएको छ भने प्रदेश सभा तर्फ २ हजार ५३ मत पाएको छ । रामेछापमा प्रतिनिधि सभा तर्फ ८४ हजार ८ सय १६ मत खसेको थियो । खसेको मतको ५ दशमलव ४९ प्रतिशत अर्थात ४ हजा ६ सय ५७ मत बदर भएको छ ।
प्रतिनिधि सभामा समानुपातिकमा देशैभरीबाट दलहरुले प्राप्त गर्ने मतको आधारमा १ सय १० सिटको बाँडफाँड हुन्छ । यस्तो बाँडफाँडमा लागि योग्य हुन दलहरुले सदर मतको ३ प्रतिशतको थ्रेसहोल्ड कटाउनुपर्छ ।
