रामेछाप– लिखुतामाकोशी गाउँपालिकाले गाउँपालिका भित्र रहेका नागरिकको आँखाको ज्योति जोगाउने अभियान चलाएको छ । जिल्ला सामुदायिक आँखा केन्द्र मन्थली र तिलगंगा आँखा प्रतिष्ठान काठमाण्डौको प्राविधिक सहयोगमा गाउँपालिकाले सबै वडामा आँखा शिविर संचालन गरेर आँखाका रोगबाट पीडित बिरामीहरु खोज्ने तथा आँखाको ज्योति जोगाउने उपायको बारेमा जनचेतना जगाउने अभियान चलाएको हो ।
लिखुतामाकोशी गाउँपालिकाका आम नागरिकलाई स्वस्थ बनाउने अभियानको यो पनि एउटा अभियान रहेको गाउँपालिका अध्यक्ष केशव महतले बताए । रहेक मानिसको अभिन्न अंगको रुपमा रहेका आँखालाई मानिसले त्यति धेरै महत्व नदिँदा आफ्नै कमजोरीका कारण पालिका भित्र धेरै मानिसहरु संसार देख्नबाट बञ्चित हुनु परेको बताउँदै त्यस्ता मानिसहरुको आँखाको उपचार गरेर संसार देखाउने र पुर्ण रुपमा आँखाको सुरक्षा गर्ने कार्यको सुरुवात गरिएको अध्यक्ष महतले बताए ।
आँखा विशेषज्ञाहरुको सहयोगमा गाउँ–गाउँमा गएर आँखाका विरामी खोजेर गाउँमै उपचार गर्ने यदि गाउँमा उपचार हुन नसकेका विरामीहरुलाई थप उपचारको लागि मन्थली र काठमाण्डौ सम्म लगेर पनि उपचार गर्ने ब्यवस्था मिलाइएको अध्यक्षले बताएका छन् । अध्यक्षका अनुसार यसरी आँखाको विरामी खोज्न र उपचार गर्न लाग्ने सबै खर्च विभिन्न सहयोगी निकाय र गाउँपालिकाले तिरेर विरामीको उपचार निःशुल्क गर्ने गरी शिविरको आयोजना गरिएको छ ।
यो वर्षबाट सुरु गरिएको आँखा शिविरलाई आउँदा वर्षहरुमा पनि नियमित गरिने अध्यक्ष महतले बताए । पालिकाका नागरिकहरुको सहजतालाई ध्यानमा राखेर गाउँपालिकामा नै ग्रामिण आँखा केन्द्रको स्थापना गरेर सेवा दिने आगामी लक्ष्य रहेको पनि महतले बताए ।
चार दिनको शिविरमा ६ सय बढीले लिए सेवा
बुधबार देखि सुरु भएको शिविर अहिले पनि जारी छ । चार दिनको शिविरमा ६ सय ६६ जनाले आँखाको सेवा लिएको जिल्ला सामुदायिक आँखा केन्द्रका प्रमुख उमेश तामाङले बताए । तामाङका अनुसार वडा नं ३ र वडा नं ५ को संयुक्त रुपमा धोवीमा आयोजना गरिएको शिविरमा १ सय ३२ जना, वडा नं १ दुरागाउँमा २ सय ५२ जना, वडा नं २ सैपुमा १ सय ५० जना र वडा नं ४ बिजुलीकोटमा १ सय ३२ जनाले आँखाको सेवा लिएका छन् ।
चार दिनको शिविरमा लिखुतामाकोशी गाउँपालिकाको वडा नं ३ र ५ मा १३ जना, वडा नं १ दुरागाउँमा १८ जना, वडा नं २ सैपुमा १२ जना र वडा नं ४ बिजुलीकोटमा १५ जना मोतिविन्दुका विरामी भेटिएका छन् ।
शिविरमा भेटिएका मोतिविन्दुका विरामीलाई मंसिर २९ गते र पौष १ गते तामाकोशी अस्पतालमा शल्यक्रिया गरिने जिल्ला सामुदायिक आँखा केन्द्रका प्रमुख उमेश तामाङले बताए ।
