रामेछाप – रामेछाप जिल्लामा नेकपा एमालेलाई क्लिन स्वीप गर्दै सत्ता गठवन्धनका उमेदवारले विजय प्राप्त गरेका छन् । सत्ता गठवन्धनबाट प्रतिनिधिसभा सदस्यका उमेदवार पूणर्वहादुर तामाङ (कान्छाराम) ले नेकपा एमालेका उमेदवार कैलाशप्रसाद ढुंगेललाई पराजित गरेका छन् । तामाङले ४७ हजार ९९ मत प्राप्त गर्दा उनका प्रतिस्पर्धि ढुंगेलले ३० हजार ७ सय २९ मत पाएका थिए ।
२०७४ को निर्वाचनमा बाम गठवन्धनका तर्फबाट माओवादी केन्द्रका श्यामकुमार श्रेष्ठ संग प्रतिस्पर्धा गरेका तामाङ यो पटक माओवादी केन्द्रकै सहकार्यमा निर्वाचनमा होमिएका थिए । उता २०५६ को प्रतिनिधिसभा र २०६४ साल र २०७० सालको संविधानसभामा पराजित भएका ढुगेल माओवादीको साथमा २०७४ को निर्वाचनमा प्रदेश सभा सदस्यमा निर्वाचित भएका थिए । बाग्मती प्रदेश सरकारमा करिव साढे ३ बर्ष आर्थिक मामिला तथा योजना मन्त्री रहेका ढुंगेल यस पटक गठवन्धन विना निर्वाचनको मैदानमा थिए । उनी एमालेका केन्द्रीय सदस्य र रामेछाप जिल्ला ईन्चार्ज हुन ।
रामेछापका दुवै प्रदेशमा माओवादी केन्द्रका उमेदवारले विजय हासिल गरेका छन् । प्रदेश १(१) मा माओवादी केन्द्रका तारानारायण श्रेष्ठले एमालेका शान्तिप्रसाद पौडेललाई पराजित गरेका थिए । श्रेष्ठले १७ हजार १ सय ४८ मत ल्याउदा उनका प्रतिस्पर्धी एमालेका पौडेलले १५ हजार १ सय ५७ मत पाएका थिए । श्रेष्ठ २०६४ को संविधानसभाको निर्वाचनमा रामेछापबाट निर्वाचित थिए । उनका प्रतिस्पर्धी पौडेल भने २०७४ सालमा बाम गठवन्धनबाट वाग्मती प्रदेश सदस्यमा निर्वाचित भएका थिए । पौडेल छोटो अवधि प्रदेश सरकारमा मन्त्री समेत रहेका थिए । त्यसैगरी प्रदेशसभा १(२) मा माओवादी केन्द्रकै युवराज चौलागाई निर्वाचित भएका छन् । चौलागाईले एमालेका मिलनकुमार घिसिङलाई पराजित गरेका छन् । चौलागाईले २२ हजार ९ सय ७९ मत पाउदा उनका प्रतिस्पर्धि घिसिङले १८ हजार २ सय ५ मत पाएका थिए ।
प्रदेश सभा सदस्यमा निर्वाचित चौलागाई माओवादी केन्द्रका पोलिटव्यूरो सदस्य हुन । यस अघि उनले प्रतिनिधिसभा सदस्यको टिकट माग गरे पनि प्रदेश सदस्यका लागि उमेदवार वनाइएको थियो । माओवादी र एमाले पार्टी एकिकरण गरी बनेको नेकपा (नेकपा ) मा रहदा समेत उनी वैदेशिक विभागको प्रमुख रहेर काम गरेका थिए । विद्यार्थी राजनितिबाट यात्रा सुरु गरेका उनले माओवादीले संचालन गरेको शसस्त्र युद्ध कालमा समेत भूमिगत राजनीति गरेका थिए ।
निर्वाचित तिनै जना सांसदले आईतबार मन्थलीमा आयोजित विजय र्याली पछि नागरिकको अघी निर्वाचनको चरणमा गरेका बाचा पुरा गर्ने प्रतिवद्धता प्रकट गरेका छन् । सरकार जसको वनेपनि रामेछापको विकासका लागि एकजुट भएर लाग्ने उनीहरुले प्रण गरेका थिए ।
