रामेछाप– रामेछापको एक प्रतिनिधिसभा र दुई प्रदेशसभा क्षेत्रमा लोकतान्त्रिक बाम गठबन्धनका उम्मेद्वार विजयी भएका छन् । आइतबार सार्वजनिक अन्तिम मतपरिणाम अनुसार प्रतिनिधिसभामा नेपाली काँग्रेस र दुई प्रदेशसभामा नेकपा माओवादी केन्द्रका उम्मेद्वार विजयी भएका हुन् ।
प्रतिनिधिसभा सदस्यमा नेपाली काँग्रेसका उम्मेद्वार पुर्ण बहादुर तामाङ कान्छारामले एमालेका उम्मेद्वार कैलाश प्रसाद ढुंगेललाई फराकिलो मतान्तरले पछि पार्दै बिजयी भएका छन् । बागमती प्रदेशको पुर्व मन्त्री समेत रहेका ढुंगेल १६ हजार ३ सय ६९ मतको फराकिलो मतान्तरले पराजित भएका छन् । नेपाली काँग्रेसका जिल्ला सभापति समेत रहेको तामाङले ४७ हजार ९९ मत पाएका छन् भने उनका निकटतम प्रतिद्वन्दी ढुंगेलले ३० हजार ७ सय २९ मत पाएका छन् ।
दुई प्रदेशसभा क्षेत्रमा माओवादीका उम्मेद्वार विजयी
रामेछापका दुई प्रदेशसभा क्षेत्रमा लोकतान्त्रिक बाम गठबन्धन भित्रको दल नेकपा माओवादी केन्द्रका उम्मेद्वार विजयी भएका छन् । रामेछाप प्रदेश सभा (क) मा नेकपा माओवादीका उम्मेद्वार तारानारायण श्रेष्ठ विजयी भएका छन् । उनले नेकपा एमालेका उम्मेद्वार शान्ति प्रसाद पौडेललाई पराजित गर्दै श्रेष्ठ विजयी भएका हुन् । श्रेष्ठले १७ हजार १ सय ४८ मत ल्याएका छन् भने उनका निकटतम प्रतिद्वन्दी पौडेलले १५ हजार १ सय ५७ मत पाएका छन् । श्रेष्ठ र पौडेल बीचको मतान्तर १ हजार ९ सय ९१ मत रहेको छ ।
त्यस्तै रामेछाप प्रदेशसभा (ख) बाट नेकपा माओवादी केन्द्रका युवराज चौलागाई विजयी भएका छन् । उनले निकटतम प्रतिद्धन्द्धी एमालेका मिलन कुमार घिसिङलाई पराजित गर्दै विजयी भएका हुन् । चौलागाईले घिसिङलाई ४ हजार ७ सय ३ मतको फराकिलो मतान्तरले पराजित गरेका छन् । चौलागाईले २२ हजार ९ सय ७९ मत प्राप्त गरेका छन् भने घिसिङले १८ हजार २ सय ५ मत प्राप्त गरेका छन् ।
