रामेछाप– रामेछापबाट प्रतिनिधि सभा सदस्यको स्वतन्त्र उम्मेद्वार रहेका चन्द्रबहादुर राउतले नेपाली काँग्रेसबाट उम्मेद्वार रहेका पुर्ण बहादुर तामाङ (कान्छाराम) लाई समर्थन गरेका छन् । बुधबार सदरमुकाम मन्थलीमा पत्रकार सम्मेलनको आयोजना गरी राउतले आफ्नो उम्मेद्वारी निष्कृय बनाइएको बताउँदै काँग्रेसका उम्मेद्वारलाई समर्थन गरेका बताए ।
पत्रकार भेटघाट कार्यक्रममा बोल्दै राउतले पार्टीबाट उमेद्वार चयन गर्ने विषयमा भएको निर्णय प्रति असहमति हुदाँ हुदै नेपाली काँग्रेस जिताउनु पर्ने महत्वपूर्ण अवस्थालाई मध्येनजर गर्दै आफ्नो उम्मेद्वारी आजकै मितिबाट निष्कृय रहेको बताउँदै निर्वाचन आयोगले आफूलाई प्रदान गरेको क्यामेरा चिन्हमा भोट नहाल्न अनुरोध गरे । उनले पुर्ण बहादुर तामाङ (कान्छाराम) लाई रुख चिन्हमा मत हालेर अत्याधिक मतले बिजयी गराउन आम मतदातालाई अनुरोध समेत गरेका छन् ।
आफुले २०३६ साल देखि त्याग गरेको मात्र नभै नेपाली काँग्रेस बाहेक अन्य पार्टीले मुलुकको हित नगर्ने भएकाले पनि आफ्ना असन्तुष्टिलाई थाति राखेर पुन काँग्रेसमै क्रियासिल हुने प्रण गरेको बताए । राउतले आफ्नो उम्मेद्वारी निष्कृय रहेको बताउँदै आफूले कुनै प्रलोभनमा नपरी २०३६ साल देखि लागेर दुख गरेको पार्टीलाई बचाउनु पर्छ भन्ने भावनाले काँग्रेसको उम्मेद्वारलाई सहयोग गरेको बताएका छन् । राउत नेपाली काँग्रेसको पुर्व जिल्ला सचिव समेत हुन् ।
कार्यक्रममा नेपाली काँग्रेसका पूर्व जिल्ला सभापति रामचन्द्र खड्का र जिल्ला सभापति तथा प्रतिनिधिसभा सदस्यका लागि गठवन्धनका उमेदवार पूर्णवहादुर तामाङ (कान्छाराम) ले राउतले निर्वाचनको मुखमा आएर पार्टी र उमेद्वार प्रति गरेको सहयोगको उच्च कदर गर्दै भविष्यमा सबैको सल्लाहमा पार्टीले सम्मान गर्ने प्रतिवद्धता जनाए ।
