रामेछाप– नेकपा एमाले रामेछाप प्रदेशसभा (क) को चुनावी प्रचार प्रसार कार्यक्रम सुरु भएको छ । मन्थली नगरपालिकाको वडा नं ५ सुनारपानीबाट मंगलबारदेखि प्रदेश सभा (क) को चुनावी प्रचार प्रसार गरिएको एमाले रामेछापका उपसचिव प्रकाश कुमार कार्कीले बताए । उनका अनुसार एमालेले सुनारपानीमा कोणसभा कार्यक्रमको आयोजना गरी चुनावी प्रचार प्रसार कार्यक्रमको सुरुवात गरिएको छ ।
सुनारपानी पार्टी वडा कमिटीका अध्यक्ष तेजबहादुर कार्कीको अध्यक्षतामा मंगलबार सम्पन्न कोणसभाबाट नेपाली काँग्रेस, नेकपा माओवादी केन्द्र र एकीकृत समाजवादी लगायतका पार्टी परित्याग गरी ४७ जना नेता कार्यकर्ता एमाले प्रवेश गरेको एमाले रामेछापका उपसचिव कार्कीले बताए । पार्टी परित्याग गरी एमालेमा आउनेहरूलाई एमाले केन्द्रीय सदस्य माधव ढुङ्गेल र प्रदेश सभा प्रत्यक्ष तर्फका उम्मेदवार शान्ति प्रसाद पौडेलले अबिर र माला लगाएर पार्टीमा स्वागत गरेका छन् ।
प्रचार प्रसारको कार्यक्रम नियमित हुने पनि उपसचिव कार्कीले बताए ।
