रामेछाप– आगामी प्रतिनिधिसभा निर्वाचनका लागि रामेछापबाट नेपाली कांग्रेसका पार्टी सभापति पुर्ण बहादुर तामाङ (कान्छाराम) सहित पाँच जनाको नाम सिफारिस भएको छ । शनिबार बसेको जिल्ला कार्यसमितिको बैठकले सभापति पुर्ण बहादुर तामाङ (कान्छाराम), पुर्व पार्टी सभापति रामचन्द्र खड्का, निवर्तमान पार्टी सचिव एक बहादुर बस्नेत (विष्णु), निवर्तमान कोषाध्यक्ष कुमार श्रेष्ठ र पार्टी प्रवक्ता नारायण बहादुर बोगटीको नाम सिफारिस गरिएको पार्टी सचिव दीपक खड्काले जानकारी दिए ।
पार्टीबाट प्रतिनिधि सभाको उम्मेद्वार हुन योग्यता पुगेका सदस्यहरुबाट शनिबार सम्म उम्मेद्वारी पेश गर्न भनिएको र सोही अनुसार निर्धारित समयमा पेश हुन आएका सबैको नाम केन्द्रीय कार्यालय र बामगती प्रदेशको कार्यालयमा सिफारिस सहित पेश गर्ने निर्णय गरिएको सचिव खड्काले बताए ।
पार्टी सभापति तामाङ २०७४ को निर्वाचनमा पनि काँग्रेसबाट प्रत्यक्ष तर्फ प्रतिनिधि सभामा उम्मेद्वार भएका थिए भने पुर्व पार्टी सभापति खड्का पनि काँग्रेसको तर्फबाट दुई प्रतिनिधि सभा क्षेत्र हुँदा रामेछाप क्षेत्र नं २ बाट उम्मेद्वार भएका थिए ।
समानुपातिकमा ९ जनाको सिफारिस
त्यस्तै प्रतिनिधि सभाको समानुपातिक तर्फ रामेछापबाट ९ जनाको नाम सिफारिस भएको छ । पुर्व पार्टी सभापति एवं संविधान सभा सदस्य आङटावा शेर्पा, पुर्व महाधिवेशन प्रतिनिधि ग्याल्जे लामा शेर्पा, पुर्व महाधिवेशन प्रतिनिधि विद्यासागर योञ्जन, पुर्व महासमिति सदस्य डा. सुमन कर्माचार्य, पुर्व महाधिवेशन प्रतिनिधि मुक्त बहादुर महते, पुर्व महाधिवेशन प्रतिनिधि सुरेन्द्र घिसिङ, काँग्रेस नेता हिमालदाश श्रेष्ठ, काँग्रेस नेतृ सुशिला मिश्रा र आमन्त्रित जिल्ला कार्यसमिति सदस्य मञ्जु पुर्वे रहेका छन् ।
दुई प्रदेश सभाको प्रत्यक्ष र समानुपातिकका लागि ६६ जनाको नाम सिफारिस
रामेछाप प्रदेशसभा (क) का लागि प्रत्यक्ष तर्फ १९ जना र समानुपातिक तर्फ १५ गरी ३४ जनाको नाम नेपाली काँग्रेस प्रदेश सभा (क) बाट सिफारिस भइ आएको र उक्त नामलाई जिल्ला कार्यसमितिले प्रदेश र केन्द्रमा पठाउने निर्णय गरिएको पनि सचिव खड्काले बताए । खड्काका अनुसार रामेछाप प्रदेश सभा (ख) का लागि प्रत्यक्ष तर्फ १४ र समानुपातिक तर्फ १८ गरी ३२ जनाको नामावली सिफारिस भइ आएकोले उक्त नामावलीलाई पनि जस्ताको तस्तै प्रदेश र केन्द्रमा पठाउने निर्णय गरिएको छ ।
आगामी मंसिर ४ मा प्रतिनिधि सभा र प्रदेश सभाको निर्वाचन एकै मितिमा हुँदैछ ।
