रामेछाप– रामेछापको गोकुलगंगा गाउँपालिकाका अध्यक्ष आफै स्थानीय खोलामा काठे साँघु बनाउने काममा जुटेका छन् । गाउँपालिकाको वडा नं ४ बेताली र वडा नं ५ नामाडीको सिमानामा रहेको स्थानीय बोहोरे खोलामा गाउँपालिका अध्यक्ष काजी बहादुर खड्का (दिनेश) काठे साँघु बनाउन जुटेका हुन् ।
नामाडीको भित्तरी र बेतालीको माथिल्लो क्षेत्रका स्थानीयलाई आवत जावत गर्न समस्या भएपछि स्थानीय सहित गाउँपालिका अध्यक्ष आफै जुटेर तत्काल समस्याको समधान हुने गरी काठको साँघु निर्माण गरेका हुन् । वर्षा याममा उक्त खोलो ठूलो हुने हुँदा स्थानीय लगायत विद्यार्थीलाई समेत समस्या हुने गरेको थियो ।
केही महिनाको लागि मात्रै तत्कालिन समस्या समधानको लागि काठे साँघु बनाइएको र भविष्यमा उक्त ठाउँमा सधैँका लागि समस्याको समधान हुने गरी झोलुङ्गे पुल बनाउनको लागि गाउँपालिकाले प्रक्रिया अगाडि बढाउने गाउँपालिका अध्यक्ष काजी बहादुर खड्का (दिनेश) ले बताए ।
यस्ता सामाजिक कामको लागि फुर्सदको समयमा जनप्रतिनिधि मात्रै नभएर सबैले हातेमालो गरेर अगाडि बढ्नु पर्ने अध्यक्ष खड्का बताउँछन् । आफू अध्यक्षमा निर्वाचित हुनु भन्दा पहिला पनि यस्ता सामाजिक कार्यमा सहभागी भइरहेको स्मरण गर्दै भविष्यमा पनि स्थानीयसँगै यस्ता सामाजिक कार्यक्रमा लाग्ने उनले बताए ।
