रामेछाप- रामेछापको कूल मतदाता संख्या १ लाख ७८ हजार ८ सय ६७ पुगेको छ । निर्वाचन आयोगले सार्वजनिक गरेको अन्तिम मतदाता नामावलीको सूचीमा रामेछाप जिल्लामा २०७९ बैशाख २९ गते सम्म १८ वर्ष पुरा भएका १ लाख ७८ हजार ८ सय ६७ मतदाता रहेका छन् । जसमा पुरुष ९१ हजार १ सय ३१ र ८७ हजार ७ सय ३६ महिला मतदाता रहेका छन् ।
आयोगले आइतबार सार्वजनिक गरेको मतदाता नामावलीमा जिल्लाको सदरमुकाम समेत रहेको मन्थली नगरपालिकामा सबै भन्दा बढी ३७ हजार २ सय २० मतदाता रहेका छन् । मन्थली नगरपालिकामा १९ हजार ३० पुरुष मतदाता र १८ हजार १ सय ९० महिला मतदाता रहेका छन् । त्यसैगरी रामेछाप नगरपालिकामा २४ हजार ९ सय ३१ मतदाता रहेका छन् । जसमा पुरुष १२ हजार ५ सय ७२ र महिला १२ हजार ३ सय ५९ रहेका छन् ।
खाँडादेवी गाउँपालिकामा ११ हजार ६ सय १० पुरुष र १० हजार ७ सय ९० महिला गरी जम्मा २२ हजार ४ सय मतदाता कायम रहेको निर्वाचन आयोगले सार्वजनकि गरेको तथ्यांकमा उल्लेख छ । त्यस्तै दोरम्बा शैलुङ्ग गाउँपालिकामा २० हजार ९ सय ३४ मतदाता रहेका छन् । जसमा १० हजार ५ सय १० पुरुष र १० हजार ४ सय २४ महिला मतदाता रहेका छन् ।
लिखुतामाकोशी गाउँपालिकामा १० हजार २ सय २२ पुरुष र ९ हजार ८ सय ७८ महिला गरी जम्मा २० हजार एक सय मतदाता कायम रहेका छन् । त्यस्तै गोकुलगंगा गाउँपालिकामा १८ हजार ५ सय २१ मतदाता कायम रहेका छन् । जसमा पुरुष ९ हजार ४ सय ४५ र महिला ९ हजार ७६ रहेका छन् ।
उता सुनापति गाउँपालिकामा १८ हजार ५ सय १५ मतदाता कायम रहेका छन् । जसमा ९ हजार ३ सय ६२ पुरुष मतदाता र ९ हजार १ सय ५३ महिला मतदाता रहेका छन् । उमाकुण्ड गाउँपालिकामा ८ हजार ३ सय ८० पुरुष र ७ हजार ८ सय ६६ महिला गरी कूल १६ हजार २ सय ४६ मतदाता कायम रहेका छन् ।
आगामी बैशाख ३० गते हुने स्थानीय तहको निर्वाचनमा रामेछाप जिल्लाभरी मतदान स्थल ९२ ओटा र मतदान केन्द्र २ सय २३ ओटा रहने निर्वाचन आयोगले सर्वाजनिक गरेको तथ्यांकमा उल्लेख छ ।
