रामेछाप- नेपाली काँग्रेस रामेछापका सचिव दीपक खड्काले वीपी कोइराला र गिरिजा प्रसाद कोइरालाको जस्तो बिचार तथा गणेशमान सिंहको जस्तो त्यागको जगमा टेकेर काँग्रेस निर्वाचनमा जानु पर्ने बताएका छन् । गिरिजा प्रसाद कोइराल फाउण्डेशन रामेछापका अध्यक्ष समेत रहेका सचिव खड्काले गिरिजा प्रसाद कोइरालाको १२ औँ स्मृति दिवसमा सोमवार आफ्नो भनाई राख्दै नेपाली काँग्रसलाई जिताउनको लागि काँग्रेसका तीन स्वर्गीय नेताहरुले तय गरेको जगमा टेकेर गाउँ जानु पर्ने बताएका छन् ।
सचिव खड्काले गिरिजाबाबुले देखाएको बाटोमा लाग्न सबै काँग्रेसलाई अपिल गर्दै स्वर्गीय गिरिजाप्रसाद कोइरालाको राजनीतिक अनुभवलाई अनुसार गरेर अगाडि बढ्न सके मुलुकमा देखिएका तानाशाहहरु आफै ढल्दै जाने दावी गरे । सचिव खड्काले शिखर पुरुषका रुपमा स्थापित स्वर्गीय कोइरालाले स्थापना गरेको शान्ति र लोकतन्त्रलाई संस्थागत गर्न पनि अहिलेको निर्वाचनमा काँग्रेसले जित्नु पर्ने धारणा राखे ।
गिरिजा प्रसाद कोइरालाको १२ औँ स्मृति दिवसमा नेपाल महिला संघ रामेछाप जिल्ला कार्यसमितिकी संस्थापक सभापति एवं प्रजातन्त्रिक आन्दोलनकी योद्ध गणेश कुमारी भट्टराईको स्वास्थ्य लाभको कामना गर्दै फाउण्डेशनले उनलाई सम्मान गरेको छ । पार्टी सचिव एवं फाउण्डेशन अध्यक्ष दीपक खड्का सहितको टोलीले भट्टराइलाई उनकै निवासमा पुगेर सम्मान गरेको हो ।
