रामेछाप- रामेछापको मन्थली नगरपालिका वडा नं ६ भलुवाजोरमा एक बालिकालाई घर भित्र पसेको निहुँमा घरधनीले २१ घण्टा सम्म डोरीले बाँधेर यातना दिइएर राखेको अवस्थाबाट प्रहरीले उद्धार गरेको छ । स्थानीय शेर बहादुर श्रेष्ठले आफ्नो घरमा सानो जातको मान्छे पसेको भन्दै छिमेकी १३ वर्षिया सरिता नेपालीलाई डोरीले बाँधेर राखेको अवस्थाबाट प्रहरीले उद्धार गरेको हो ।
सोमबार अपरान्ह ४ बजे देखि मंगलबार मध्यान्न १२ बजे सम्म श्रेष्ठले सानो जातको मान्छे घरभित्र पसेर दही खाएको र घर अछुतो भएको भन्दै पीडितका परिवाले रुद्री लगाएर घर चोख्याउन खर्च नदिए सम्म नछोड्ने बताएपछि घटना बाहिरिएको थियो ।
बालिकालाई घर भित्र पसेर दही खएको निहुँमा डोरीले बाँधेर राखेको खबर पाउन साथ त्यहाँ पुग्दा हात, कम्मर र खुट्टामा बाधेर बस्न समेत अफ्टेरो हुनेगरी राखिएको अवस्थामा देखेको पीडित बालिकाका ठुलोबुबा सार्के नेपालीले बताए । उनले छोड्न अनुरोध गर्दा पीडित बालिकाको आमाले घर चोख्याउन रुद्री खर्च नदिए सम्म बालिकालाई नछोड्ने भनेपछि स्थानीयलाई खबर गरेर घटनाको बारेमा जानकारी गराइएको सार्के नेपालीले बताए ।
पीडित बालिकाले आफूलाई घरभित्रबाट निकालेर घरको दलिनमा डोरीले बाँधेर सिस्नु लगाउँदै लौरोले कुटेको बताइन् । डोरीले बाँधेर राखेको कारण राती दिसा–पसिाब गर्न समेत अफ्टेरो भएको पीडित बालिकाले बताइन् । आफूलाई महिनावरी भएको कारण डोरीले बाधिएको अवस्थामा रात कटाउन निकै मुस्किल भएको पीडितको भनाई रहेको छ ।
बालिकाले घरभित्र पसेर दही खाएको निहुँमा मंगलबार देखि बाँधेर राखेको खबर सुनेको र घटना स्थालमा पुगेर श्रेष्ठ परिवालाई बालिकालाई छोड्न अनुरोध गरेपनि अछुत भएको घर नचोख्याए सम्म नछोड्ने अडान राखेपछि आफूहरुले पनि केही गर्न नसकेको मन्थली नगरपालिका वडा नं ६ की वडा सदस्य भक्तमाया श्रेष्ठले बताइन् ।
घटनाको बारेमा वडाध्यक्षले खबर गरेपछि बालिकाको उद्धार गरेर ल्याइएको र पीडक शेर बहादुर श्रेष्ठलाई नियन्त्रणमा लिएर अनुसन्धन प्रक्रिया सुरु गरिएको प्रहरी प्रमुख प्रहरी नायव उपरिक्षक राजकुमार थिङले बताए । घरभित्र पसेकै कारणले जातिय विभेद गर्न नहुने कानून भएपनि कानूनको उलंघन गरिएको देखिए कानून अनुसार पीडकलाई कारबाही हुने प्रनाउ थिङले बताए ।
पीडक श्रेष्ठले भने बालिकाले आफूहरु घरमा नभएको समयमा घर भित्र छिरेर दही चोरेर खाएको आरोपमा बाँधेर राखेको दावी गरेका छन् । परम्परा देखि नै सानो जातको मानिस आफ्नो घरभित्र नछिरेको बताउँदै दलित बालिका घरमा छिरेपछि घर चोख्याउनु पर्ने सार्त राखेको स्थानीय र पत्रकार सामू स्वीकार गरेका छन् ।
४ कक्षामा पढ्ने बालिकाको विद्यालयमा समेत अनुशासित छात्रा भएको बालिका अध्ययनरत विद्यालयका प्रअ प्रल्हाद सुवेदीले बताए ।
